重播你有Say ! 杏兒Like爆《執到寶》

煲劇是最佳減壓節目，深宵時段重睇經典劇集已成為大眾集體回憶經典劇時段，令不少打工仔捱住眼瞓對住電視機想當年，向來緊貼所有熱播娛樂節目的《東網巨星》App，繼推出《港姐任你Like》後，今次與無綫有新搞作，於昨午四時推出《重播你有Say》，於芸芸經典劇中嚴選十劇讓大家畀Like，展開為期兩周的投票活動（截止投票日期為9月28日下午4時）。

《 http://on.cc/tvbdrama 》

黃子華、鄭裕玲孭飛演出的《男親女愛》曾創下50點收視紀錄！	陳凱琳認為經典劇集《男親女愛》百看不厭。	胡杏兒身為視后，她的心水重播經典劇是《執到寶》，與「視帝」黎耀祥意見一致。

兩投票階段即展開

無綫方面待終極經典劇誕生後，將緊接劇集《大鬧廣昌隆》於10月5日深宵時段播放，今次東網巴絲有得Say，任何一票都好重要。投票將分兩個階段進行，第一階段除了有入圍的十套經典劇的精彩劇照、片段及故事簡介外，《東網巨星》facebook還設立必睇推薦位，為各位巴絲解構各經典劇，透明度十足，第二階段則於下星期展開。投票方法簡單，只要於心水劇集的Profile專頁畀Like，即成功投票，投票亦不設上限，十套入圍的劇集都喜歡的話，大可Like足十套劇！

黎耀祥	傅嘉莉最想重播《男親女愛》。

要睇甘國亮踩雪屐

《東網》亦率先找得演員進行投票，視帝、后黎耀祥（祥仔）及胡杏兒不約而同揀《執到寶》，祥仔自言小時候看該劇已印象深刻：「套劇有講少少鬼上身，但又唔係好恐怖，都幾得意、幾有感情，圍繞一家人嘅親情咁處理，當時嚟講係好新嘅題材，一套劇有咁多元素係好難、好考究，有耳目一新嘅感覺。」杏兒雖然未曾看過該劇，早聞該劇已成經典：「我知甘國亮有份演亦有份編，喺劇入面佢仲有踩雪屐，不過踩成點我就唔知，所以咪好想睇囉！」

「女神」界別代表陳凱琳（Grace）與傅嘉莉（Kelly），選擇了黃子華、鄭裕玲火花不斷的《男親女愛》，當年該劇收視高達50點，大讚該對黃金組合既搞笑又好睇。

陳凱琳愛《男親女愛》

Grace說：「當年我喺加拿大睇帶，都睇咗兩、三次，兩位主角火花好特別，好少電視螢幕情侶咁爆，成日鬧大交，唔係一起步就情情塔塔。（邊幕最難忘？）食龜苓膏嗰幕，子華仲生咗粒暗瘡，但佢死拗話自己青春，Do姐為證明自己青春，即刻買好多龜苓膏食，結果就爆好多粒暗瘡，真係好好笑囉！」Kelly說家人一直大讚該劇，未有機會欣賞的她說：「我好欣賞佢兩個，亦有睇開Do姐嘅戲同子華嘅Talk Show，兩位都好有才華，擦出火花好多人鍾意，所以梗係想追番呢套劇啦。」文：影視組