林佩瑜戒辣從良作樂
「嫩版楊愛瑾」林佩瑜（Crystal）曾推出性感寫真，怎料引來神秘男出五位數邀約「共度春宵」，最終請對方硬食檸檬，但為免再惹人遐想，她決意洗底「從良」殺入樂壇唱情歌，誓要升呢做「港版梁靜茹」。
「嫩版楊愛瑾」林佩瑜曾加入女子組合FFx推出火辣寫真集，不過性感形象卻為她引來另類「飛來蜢」，曾收到不少神秘富商邀約出席飯局，坊間更流傳各隊員的「過夜價」，她說：「經理人公司就冇呢啲Offer畀我哋，但有人會私底下搵我哋做呢啲嘢，接唔接就睇你自己，我就冇接過。對方會喺Facebook搵我哋，我都試過收到呢啲訊息，會講明要過夜，同埋有人開價，都有人講過我哋FFx入面每個女仔價錢係幾多，但其實我哋係冇報過價。」
一個飯局都冇去
Crystal透露初入行時收到最多這類飯局邀請，可是她拒絕出賣肉體，絕不會被金錢動搖：「初出道會成日遇到呢啲情況，啲人蝦你乜都唔識，睇你做唔做囉。我記得有人開價好似係幾萬蚊，我唔會回應佢哋，一個飯局都冇去過。有女仔成日話同大老闆、導演食飯，被『睇中』咗會多啲工作，但我唔認同呢個做法，覺得唔係靠呢啲嘢去令人認識。」
啱唱梁靜茹情歌
為免再受到不必要的滋擾，Crystal決定退出寫真界，轉型做歌手殺入樂壇，洗甩Sexy味！她近日跟歌唱老師惡補唱功，不時會翻唱偶像張國榮及王菲的金曲練習：「老師話我技巧唔夠，但我唔係學巨肺式高音，唔夠G.E.M.（鄧紫棋）咁叻，我反而係唱抒情歌，老師話我把聲適合唱梁靜茹嘅歌。」
林佩瑜Profile
年齡：23歲
身高：1米60
體重：90磅
三圍：32B-23-33
工作：2014年是組合FFx成員，曾推出性感寫真，並客串過now TV節目。
文：音樂組