祖藍買起小島冧李亞男

藝人王祖藍、譚炳文、朱咪咪及印度籍馬來西亞歌手莫翰等，前晚到電視城錄影無綫節目《Sunday靚聲王》，期間圈中出名是「愛妻號」的祖藍繼日前為太太李亞男大手筆「摸頂」購入億萬愛巢後，他大爆豪宅擁有權只寫上太太名字：「我依家最重要嘅係老婆，最緊要佢開心。（所以億元豪宅只落李亞男名？）冇乜所謂啦，斷估佢好信得過。」

「每朝有飯攞返工」

祖藍接着隔空冧爆太太，更開玩笑揚言要為對方買起小島：「佢唔單只入得廚房，仲行得紅地氈，買個島畀佢都願。」他透露太太每日貼心照顧，直認「夫復何求」，認真sweet到漏，祖藍謂：「依家每朝起身就有飯攞返工食，啲衫又執好晒，夫復何求呢？」

談到錫太太錫到燶的祖藍對李亞男的獎勵是否陸續有來？他雖否認，但仍笑言要繼續努力工作：「冇喇，買晒樓喇，依家餐搵餐食喇！」大晒甜蜜的他眼見同場的朱咪咪以誇張紅毛登台look現身，他即與對方大擺爆笑甫士，更自貶謂：「我覺得自己真係着得太低調，今晚我會唱啲七十年代金曲。」其後貪玩的祖藍又拉實一身旗袍美艷亮相的汪明荃，齊齊chok爆合照。

文：影視組