祖兒拍拖Selfie與龍共舞

格林美音樂獎得主、美國人氣搖滾樂隊Maroon 5前晚於亞洲國際博覽館開騷，現場9成爆滿，不少港星都有撐場，祖兒與劉浩龍（師兄）齊齊戴帽，隨好友徐濠縈及康堤低調進場，眾人被記者發現時，祖兒即尷尬彈開，後來答應合照亦攬實康堤避嫌，相當小心！

好友做「擋箭牌」

不過靚仔主音Adam Levine晚上9時一出場，全場即瘋狂尖叫，初時搵好友做「擋箭牌」兼零交流的祖兒與師兄，聽到中段都情不自禁化身小粉絲跟住跳，揮手「un腳」相當有默契，更放低戒心衝破好友「防線」密密斟，只見祖兒密密冧笑，終於放心享受拍拖時光，二人完場前又與友人自拍，好不盡興！至於一早走入控制台睇騷的「國際漿」鄧紫棋（G.E.M.）全晚邊睇邊揈手打拍子，唔講以為佢開騷！

避忌彈開	忘我自拍	Maroon 5主音Adam出場，全場即瘋狂尖叫！

有粉絲嗌「回水」

Adam當晚落力連唱6首歌才與粉絲打招呼，全場大合唱《Daylight》、《Maps》及《Payphone》等名曲，Adam落力飆高音又拎姣爆粉紅結他騷Quali外，更識做將外套及水樽拋落台，搞到台下粉絲陷入瘋狂，樂隊未有演唱電影《一切從音樂再開始》（Begin Again）的人氣歌曲《Lost Stars》，最後以冧爆歌曲《Sugar》結束個半小時演唱會！不過另有粉絲一完場就嫌唔夠喉而大叫「回水」，相信早前被黃牛黨炒高3倍價錢炒飛的受害粉絲可能更覺蝕底！

文：外娛組