徐綺雯張張刀 做犀利人妻
嫁給澳門製衣業太子爺的名媛徐綺雯（Candy）名副其實是犀利人妻，婚後生活非常充實，做司儀、拍廣告兼攻讀韓文，雖然和老公一樣百足咁多爪，但原來忙碌也是維繫夫婦感情的關鍵！
緣於好學及坐唔定的性格，Candy婚後繼續模特兒工作外，亦曾嘗試做電台節目主持，又常為慈善活動擔任司儀，最近更鑽研日本樹脂黏土手工藝，百足咁多爪！本身已考獲日語三級水平的Candy，近日埋首攻讀韓語，原來是為了丈夫Simon！
讚老公似韓星
Candy說：「因為老公會同韓國人做生意，我希望幫吓手做翻譯。學咁多嘢都係自我增值，結咗婚唔代表全部時間畀晒家庭，都可以善用時間發展自己嘅興趣。學韓文初期真係覺得難，因為唔似得日文咁有漢字，但當你經歷過要背拼音嘅日子後，就會覺得好易。我依家先煲《來自星星的你》，其實我老公都似韓星，哈！每次去韓國，當地人都以為我哋係韓國人，去餐廳侍應生會畀韓文餐牌兼同我哋講韓文，可能因為佢單眼皮啩！哈！」
增進夫妻感情
Candy與老公Simon均百足咁多爪，Simon打理家族製衣業生意外，最近正搞網上購物平台售賣國際品牌的衣履，於本月底推出。兩夫婦如此忙碌，共處時間豈非很少？Candy說：「老公時間管理上做得好好，公事唔會帶返屋企，而我學嘢都係趁佢返工嘅時間去學，所以唔影響共處時間。」御夫有道的Candy說大家性格雖不同，但有共同話題及興趣，有助增進感情，她笑說：「我哋識嘅嘢唔同，大家會互相欣賞，好似佢喺電腦方面較叻，呢啲時候咪要靠佢。我哋無時無刻都喺埋一齊，做咩事都好，我哋都會商量咗先下決定。」文：專案組 攝：吳文聰 服裝及場地：Etoffe