劉威煌處男騷回憶發Sing
有「威煌隊長」之稱的劉威煌簽約新公司「重出江湖」舉行半翻唱音樂會，勾起大家對自己的原始記憶，更揚言：「唔夠歌？未驚過！」誓要舉行一場新舊交替回憶滿滿的「賣Time」音樂會！
憑參加《超級巨聲》入行的劉威煌經歷六年高高低低，今年終獲唱片公司老闆林盛斌賞識簽約旗下，更將於下月16日假九展舉行《My Time音樂會》。講到入行六年後終開個人騷，威煌直言沒有苦盡甘來的心態：「其實係一直以來累積落嚟，如果六年前開騷，邊個會識我劉威煌？我係唱歌比賽出身，今次重回live嘅舞台，好有返回原點嘅感覺，搵番當時唱歌理由同初衷。」
新曲唔夠撐
雖然對音樂會滿腔熱誠，但威煌亦坦言曾經擔心過自己的原創歌不夠充撐場面：「我嚟到新公司得四首新歌，一開始都有諗過唔夠歌嘅問題，但我比賽出身，都唱過好多人哋嘅歌，所以我今次開騷自己歌同翻唱歌會各佔一半。」威煌希望每首歌的選擇都會包含住自己的原因，當中亦有不少是很經典，但漸漸被人遺忘了的歌。
指定唱《妄想》
講到用「冷門歌」舊歌翻唱可會令人難有共鳴？向以人情味行先的威煌就話：「唔會啊，係大家嘅集體回憶，一響起就個個都識！都係嗰個時代主流歌，只係冇咩人會拎出嚟唱。」威煌又笑言今次指定要唱丁子高過去所屬組合VRF的《妄想》，更強烈推薦這首歌當年風靡K房！文：音樂組
攝：吳文聰
Hair：
Franco Chung
@Hair Corner