鄭中基爭做龍友（目及）實水着雨僑

藝人鄭中基（Ronald）、雨僑、「牛雜妹」李美棋（Monnie）及「娃娃舜」黃宏舜等，前晚在旺角出席電影《猛龍特囧》慶功宴。提到雨僑早前聲稱票房達二千萬就穿水着坐電車？Ronald爆笑舉手做另類「龍友」：「咁我幫佢影相。（佢冇話着三點式？）我都冇話影咩，可能影電車同風景！」至於雨僑自爆未問准男友羅力威能否穿水着：「都冇講定係咩水着。（問准男友未？）未諗，（票房）近二千萬先識驚。」

冧莊參演續集

談到累積票房達四百萬，Ronald笑言自己忙於拍戲大感「矇查查」，但仍對票房佳績感高興。問他可有打算接拍續集？Ronald表示導演胡耀輝早已構思續集內容，而自己亦答應繼續出演。談到鉛水問題，Ronald透露女兒就讀的學校未進行驗水，故會叫女兒自備食水上學。

牛雜妹撐港姐

同場落選港姐「牛雜妹」Monnie就表示有留意港姐決賽，又大讚冠軍麥明詩表現好。有指麥明詩贏比賽卻輸友誼？Monnie表示：「我未見過佢本人，但難用單一鏡頭決定佢受唔受歡迎。（你同電影公司老闆蕭定一簽咗約？）未呀！」而「娃娃舜」就透露太太已入院準備生B女：「佢已入院十日，BB胎盤打橫咗。（唔開刀生B？）BB再唔轉身就要喺九日開刀。」

文：影視組