祖兒為克勤減磅食之無味

天后容祖兒和李克勤將於本月11日起假紅館舉行一連十二場「容祖兒李克勤演唱會2015」，進入開騷倒數階段，連日來克勤、祖兒加緊操練，昨日雖然是公眾假期，但兩人齊犧牲休息及家庭樂的時間，返排舞室練歌、操舞，祖兒更將綵排相放在微博和粉絲分享他們努力的成果。

身穿小背心、緊身褲的祖兒和克勤全情投入排貼身舞，雖然只是排練，她也功架十足，舉手投足都能發放舞后風采；曾自言舞技較遜的克勤，在將勤補拙下，正如祖兒爆料一樣，舞技明顯有大進步。克勤更雙手橫抱拗腰提腿的祖兒，相中的兩人相當合拍，相信到正式開騷時，兩人共舞默契會更進一步。

興奮排舞

昨日祖兒接受電話訪問時，被問是否騷期愈近，心情愈緊張？她說：「冇緊張，心情愈嚟愈興奮就真，尤其知道克勤啱啱喺內地返嚟香港，但連休息都唔使，就即刻嚟排練，我見佢咁認真、積極，又點可以偷懶呢！」問到她似乎又消瘦了，她卻嫌未夠，望可在數日內再減10磅：「依家都未去返我之前開個人演唱會嗰陣時嘅體重喎，我想再瘦啲、輕啲，其中一個原因係為克勤，因為同佢跳舞時，佢會有好多抱住我嘅動作，如果我再輕啲，克勤就唔使咁辛苦。」

飲愛心湯

至於極速減磅方法，祖兒透露必須每餐去糖、去鹽、走油兼零澱粉質：「食無味嘅蛋白同白烚雞肉，會繼續飲媽咪煲嘅湯，當然阿媽唔會整蠱我落肥肉煲湯，全部都係好清嘅湯嚟嘅。」

昨早才由內地搭飛機返港的克勤，據知前日錄影內地歌唱比賽《蒙面歌王》第二次半決賽，一雪前恥揮低內地歌手李泉及台灣歌手黃小琥，以最高分數成功殺入九月底的決賽。克勤在社交網留言：「終於可以回港了，可以專心準備演唱會了。至於賽果（《蒙面歌王》），之前我講過我不能透露啊。」

文：音樂組