Ricky晚晚有「夢」雷有輝：飲補酒啦!

由RoadShow和威利來干邑合辦的《粵語歌曲排行榜頒獎典禮》前晚在會展順利完成。活動雲集眾多歌手出席，並邀得林子祥、盧冠廷及太極樂隊任表演嘉賓。全晚焦點莫過於太極鼓手Ricky，自早前跟戴夢夢爆出戀情後，接連被前妻公開鬧爆，又被《好報》拍得跟夢夢酒後街上纏綿，但兩人一直都未有回應，直到前晚Ricky終在眾隊友和夏韶聲陪同下受訪。

Ricky先對太極獲頒「殿堂搖滾樂隊大獎」表示：「入行30年攞到呢個獎，真係發夢都冇諗過。」眾成員一聽到「夢」字即笑指Ricky：「成日發夢，佢發好多夢(口架)。」Ricky即說：「得一個啫，唔好亂講。」隊友劉賢德又謂：「唔怪得我冇夢發，你個夢咁靈。」眾人你一句我一句寸爆Ricky，最後鄧建明抵死完場：「最緊要在夢……維持秩序。」

戴夢夢自被爆戀情後，一直未有正面回應。	Ricky（左二）慘被隊友圍寸戀情。	Ricky早前被《好報》拍得與夢夢酒後街頭狂啜。

間中陪枕鋪路同居

問到Ricky目前與夢夢發展？他說：「依家咪晚晚發好夢囉。（有夢夢在枕邊一同發好夢？）好尖銳，未必嘅，有時啦。」夏韶聲就說：「Ricky之前有同我講過，真係可喜可賀，問題係你哋幾時結婚生番個先。」Ricky即驚喊：「嘩，唔好亂講。」

早前被拍得酒後失儀，問到現在有否減少飲酒？Ricky說：「我最近飲涼茶，冇錢飲酒。」今次就到隊友雷有輝取笑：「佢依家梗係飲補酒啦。」提到Ricky與夢夢又被拍得去睇樓，問到是否打算置業？他說：「有咩可能，都係睇吓啫，都要搵地方住，睇吓唔一定要買。（二人世界？）都有咁嘅可能，醞釀中。」

騷名改為I Have a Dream

Ricky早前在夢夢契爺的生日派對中，與契爺攬頭攬頸，問到契爺對兩人戀情可有意見？他說：「佢冇咩講，嗰日佢生日我同佢攬一攬啫。」劉賢德笑問：「唔係外父咩？」Ricky又稱自己此舉是幫太極一把：「以後31、32、33年都有得開演唱會。」問到可想到演唱會名字？成員蛇仔即大叫：「I Have a Dream。」劉賢德再加把嘴：「愛與夢飛翔啦。」最後問到Ricky跟前妻Anne的離婚手續進行得如何？他說：「正在處理中。」

而同場的組合Super Girls獲頒「最受歡迎組合獎」，對有傳成員Aka是伍允龍跟鍾嘉欣的第三者，對此Aka否認：「伍允龍係我哋嘅武術師父，上個月我哋一齊拍電影啫。」又稱自己要專注工作，暫時不考慮拍拖。

文﹕音樂組