ZolarWind音樂夢不死

在香港七百萬人裏,很多人每天營營役役上班下班,夢想漸漸被社會磨蝕得一乾二淨。新進樂隊ZolarWind入行前做過「音響咕喱」,試過被取笑發音樂夢,但他們偏偏要勇闖這個難以餬口的樂壇,只為理想,不為生活。

太陽娛樂旗下的樂隊ZolarWind由黃柏高一手發掘,新歌《七百萬個小宇宙》教人勇於追夢,不要輕視身邊每個小角色,歌詞背後原來各人也有另一番故事。

被前輩藐爆

結他手湯美自小懷着一團音樂火,入行前在錄音室當技師仔,每日只能看着別人玩音樂,卻沒有他的份兒:「覺得好辛苦,當時有個目標就係儲錢去外國學結他,所以堅持每日放工就練結他。最後成功去到外國讀音樂,啲同學仔就會笑我,話我為興趣竟然嘥咁多錢,覺得我戇居。」幸好最後「彈」出血路,被內地歌唱比賽《我是歌手》欽點擔任結他手。

女主音Quinn試過被前輩藐爆,幸好她用實力證明自己:「唔好睇小每個人,就算機械冇咗一粒螺絲都唔得啦。我覺得每人入行時都會遇到呢啲情況,好多人覺得我呢啲o靚妹行開啦!我咪只好忍耐,做好自己。」鍵琴手藝琛雖然在行內經驗豐富,做過不少歌手的音樂監製,可是他也試過觸礁:「我做唱片試過有公司搵我編歌,但大家諗法唔一樣,有時覺得好難頂,根本唔make sense、唔好聽,雖然當下未做到自己心入面嘅嘢,但千祈唔好磨蝕自己。」

做音響咕喱

鼓手波子在音樂路途上亦曾經失意,最終被迫轉行搬運音響:「行內人覺得我打得太花巧,演唱會通常想要穩陣,有段時間幾洩氣,冇工開,要推音響幫手set場,即係『音響咕喱』囉!但我一收工就去練鼓,道火係唔會熄。」最終「打」出個未來,有幸為歌神陳奕迅巡唱擔任御用鼓手。

文:音樂組 

場地:柏斯琴行