汪明荃髮惡嚇秋官抽乾4小生
上星期謝賢怒摑曾江一幕熱爆全港，想不到連德高望重的汪明荃（阿姐）亦湊熱鬧，昨日出席節目記者會時與鄭少秋（秋官）「玩寸」掌摑事件，她作狀扮嬲秋官遲到，突然拆甩髮髻玩「揈水髮」，又推開「勸交」的胡渭康，入戲之極嚇呆秋官！兩人最後攬攬錫面，溫馨收場。
謝賢怒摑曾江誤中胡楓一幕成為全城熱話，成功催谷節目《4個小生去旅行》前晚首集收視，潮爆的資深藝員汪明荃亦有跟進事件，昨日她與鄭少秋、韋綺姍、胡渭康、洪卓立及林欣彤等出席節目《Sunday靚聲王》記者會，阿姐表現少有的佻脫，更搞笑「重演」事件，碰巧兩個記者會都在同一酒店舉行，只是不同貴賓廳。
唔鍾意玩真人騷
起初汪明荃接受訪問，提到掌摑事件，她表示得悉此事但未有細看片段，開頭以為是節目宣傳：「一把年紀都咁火爆好少見，希望我到時唔係咁啦！（有冇見過謝賢發火？）冇！佢好斯文，曾江就冇咩合作，但佢冇咩嘢吖！修哥（胡楓）就更加冇嘢啦！」阿姐又向記者八卦當時的Joe Junior在做甚麼，得知對方專業地收音後，她即忍不住笑晒：「佢有冇嚇到手震呀？」而她知道《4》會播十集時，即說：「唔怪得咁躁啦！拍咁耐，老人家辛苦呀！（去了解吓？）唔會啦！我咁多嘢做。（如果搵你拍《4個花旦去旅行》？）我唔鍾意真人騷，呢啲錢唔係我賺，我比較重視私隱。」心情High爆的她做完訪問見到秋官尚未到場，作狀扮嬲說：「秋官仲未嚟？我真係想發火喇！」
其後秋官到場，阿姐即箭步上前及拆甩髮髻，在秋官面前狂揈頭髮，並笑稱：「佢打我呀！有冇搞錯！」嚇得秋官頓時呆晒，胡渭康於是上前「勸交」，阿姐即推開他，並叫秋官為她整理髮髻，秋官亦乖乖照做，他笑說：「我喺度阿姐當堂生晒！」最後兩人攬攬錫面，以溫馨場面做Ending。
拒加入怕做阿四
事後問到秋官可有嚇親？他笑說：「唔好咁啦！咁犧牲自己形象，可能佢呢排做慣大戲未放得低。」他又自爆當初Joe Junior曾提議他加入《4》，但最終未有成事：「我唔想做阿四，又唔想好似阿四咁畀人打喎！（怕太辛苦？）講笑啫！但聽人講個節目要服侍人，我都想要人服侍喎！依家佢哋有晒宣傳效果啦！大家都想睇，呢招高招呀！連阿姐都要偷橋。」
提到謝賢及曾江，秋官表示曾江說話一向大聲，但其學識高，會不時提點人，而他更未見過謝賢真發火。問到若安排跟阿姐拍旅遊節目可會答允？秋官笑說：「咁咪要全程服侍佢？值得商榷吓！做節目舒舒服服算啦！做呢個節目（《Sunday靚聲王》）都辛苦呀，成日要排舞同練新歌。」另外，阿姐透露節目有望錄影至年底，亦有興趣以節目名義開演唱會，相信定有大批fans支持。
文：影視組