Hilary問題少女備戰婚紗騷

近年最矚目的「星二代」，非名媛上山詩鈉（Anna）的18歲索爆女兒Hilary莫屬，她憑着甜美樣子加上完美身段，迅速成為不少品牌的新寵兒，連Anna的好友香港著名時裝設計師何國鉦（Dorian）亦誠邀Hilary為自己將在本月舉行的婚紗騷行騷。Hilary早前便親身前往Dorian的工作室挑選戰衣，二人甫見面即以流利的英文打招呼和對答。

左照右照好滿足

Hilary率先試穿一件印有黑色暗花的白色婚紗，她還化身問題少女向Dorian請教此件婚紗的設計靈感和概念，二人站在鏡子前細心研究穿着效果，Dorian期間更以手拉緊裙腰位置，以量度和收窄腰圍，來盡顯Hilary的完美曲線。其後Hilary繼續在茫茫「白」海中揀選心頭好，最後情歸一件純白透視上肩的婚紗，並馬上到更衣室試穿，換上心頭好的Hilary隨即走到全身鏡前左照右照，還一臉滿足地擺動裙襬，展現亮麗動人一面！

何國鉦為Hilary收緊腰圍。	Hilary揀中這件白色婚紗，開心得在鏡前左照右照。	面對眾多漂亮的婚紗，Hilary笑言眼花繚亂。

入行與否睇機會

問到Hilary是否首次行騷？她表示已是第二次為Dorian行騷：「第一次係好多年前，自己仲好細個，今次係第二次啦，但就係首次着婚紗，行騷係想儲多啲經驗，同埋係入大學前最後一個工作，（想入行？）睇吓讀完大學4年後有冇興趣，睇吓會唔會想做其他嘢，真正入行要睇機會，（媽咪贊成？）佢贊成，佢都係睇吓我讀完書想點，冇乜畀壓力我，（大學主修咩科？）我係讀室內設計。」談到以「星二代」身份行騷，會否大感壓力？她說：「冇喎，唔好同其他人比較，如果搵人做比較，有時就會覺得自己唔夠好，不過我自己完全冇呢方面嘅壓力。」

文：名人組