HunterZ鄧詠雪被誘上房失４萬報警
近日香港騙案頻生，今次有女藝人中招，涉詐騙案受害人正是蕊蕊所屬的女子組合HunterZ成員鄧詠雪（Suetzi），Suetzi被訛稱是譚詠麟老友兼太陽娛樂文化高層的「騙徒」斟她簽約過檔，最後被騙去近四萬元血汗錢，而她更多次被誘騙上酒店房！前晚Suetzi得悉墮入「騙局」報警求助，她說：「太蠢，我真係天真又傻囉。」
現年25歲的Suetzi舞蹈員出身，之後轉型做歌手加入蕊蕊為首的跳唱組合HunterZ，但因發展平平，一心想有大發展機會的她成了目標，Suetzi上月20日在網上有一名自稱是太陽娛樂高層的Garry接觸她，對方訛稱簽她過檔太陽娛樂，Suetzi看其fb有此職銜竟信以為真，於22日相約見面，對方藉詞要幫她處理與舊公司解約費及律師費用等各種藉口，短短兩周Suetzi與Garry多次見面，並前後交給對方近四萬元。期間男方藉詞簽約，兩度邀Suetzi到酒店房，及一次上男方家中過夜，Suetzi當時拒絕對方，否則財色「雙失」。
譚詠麟間接拆「騙局」
Suetzi最終驚覺受騙，是因為男方曾在她面前展示與譚詠麟（阿倫）的合照，並在她面前訛稱與阿倫通電話，說阿倫答應「力撐」她；由於Suetzi曾以舞蹈員身份跟隨「左麟右李」巡唱走埠演出，因而認識阿倫助手，她致電阿倫助手查問阿倫可認識此人，始知阿倫根本不認識所謂「Garry 」，才恍然大悟自己誤墮騙局。前晚Suetzi由好友張致恒女友莊端兒及男友人陪同下往尖沙咀警署報警求助，直到昨日（9號）凌晨十二時半Suetzi才錄畢口供離開。
Suetzi在警署門外痛斥自己太蠢：「真係太傻太天真，畀人呃咗錢，仲斷送咗自己事業啦。」Suetzi講述被詐騙經過：「係網上見到佢話想搵人拍廣告，我就答應咗，就開始WhatsApp溝通，亦約咗出嚟見面，當時佢話自己係太陽娛樂嘅職員，問我有冇興趣過檔，佢offer啲條件好好嘅，又話捧我，會幫我出歌呀。」
被摸手呃上酒店房
之後對方用不同理由推遲簽約，Suetzi說：「話Paco（太陽娛樂揸Fit人黃柏高）唔得閒，又話Paco信嘅師傅話我時辰八字今日唔簽得，聽日先簽得，自己都開始覺得可疑。」對方又要她換電話卡，禁止她與外界聯絡，聲稱怕她簽約一事令舊公司煩她：「我諗諗吓冇理由會咁樣，我咪翻查佢資料，發現太陽娛樂出咗個聲明，話Garry根本唔係佢哋職員。」
Suetzi稱當日對方以處理舊約為由，說她要負責部分律師費：「都多（口架），畀咗三萬左右，佢仲搬埋譚詠麟出嚟，話同譚校長好熟，遲啲美加站巡唱預埋我，但要我畀機票錢及其他費用近萬。（點解唔同校長求證吓？）因為佢喺我面前打畀校長，佢做戲做得好足，咁咪信咗囉，今日我搵譚校長助手求證，但我知得太遲……我太蠢啦！」問對方可有向她摸手摸腳？Suetzi無奈說：「有摸到手囉！同埋想呃我上酒店囉！第一次係話聽日會搞記者會，怕我遲到，所以安排咗間房喺酒店叫我瞓一晚，第二次又話Paco喺澳門開生日Party，叫我帶埋衫留宿一晚；又有次叫我上佢屋企錄音，三次我都拒絕咗冇去。」
自責蠢冇得做主角
警方如何處理？Suetzi指警方將此案列為涉詐騙案：「錢嘅損失事小，我唔希望佢害其他女仔。」可聯絡得到Garry？Suetzi坦言：「佢頭先係咁打畀我，因為我用番自己個電話卡，我冇再聽，佢亦冇留言。」她承認這次是很大教訓，失去近四萬血汗錢，還喪失一部電影女主角機會，可謂「雙失」。
至於其好友莊端兒勸Suetzi報警，莊端兒謂：「因為佢有排失蹤咗，我好擔心佢，但Suetzi突然聯絡番我，話畀人呃咗，我叫佢報警，錢未必追得番，最少要畀知人有呢啲事。」
而記者曾致電找Garry，但多個電話號碼都未能接通，其中一個成功接通卻未有人接聽；而以Suetzi提供的資料，昨日在fb尋找到這個Garry的用戶名稱，並以太陽娛樂高層職銜自居，但到昨晚已取消帳戶。
變舞蹈員變歌手
Profile
姓名：鄧詠雪（Suetzi）
年齡：25歲
三圍：32、25、34
入行經過：前身為舞蹈員，去年在朋友介紹下認識蕊蕊，與蕊蕊、陶枳樽（Crz）等組成跳唱組合《HunterZ》。
案件重演
鄧詠雪（Suetzi）滿心歡喜以為遇上「金牌伯樂」，誰知原來陷入「網上神棍」騙局，短短兩個星期多，「大拿拿」四萬蚊見財化水之餘，被人抽水摸手仔甚至險呃埋色，Suetzi真人示範被誘騙經過，有發明星夢的年輕人真的要帶眼識人嘞！
7月20日
自稱是太陽娛樂文化高層的Garry透過網上接觸Suetzi，聲稱簽她過檔。
7月22日
Garry首次相約Suetzi見面，聲稱幫她解除舊公司合約及將力捧她。
7月22日至8月7日期間
Garry多度聯絡Suetzi及相約見面，曾要求她付錢處理舊合約及律師費，總數近4萬元，不虞有詐的她（才禁）機畀錢對方；Garry又稱怕她出席活動會「瞓過龍」，安排酒店房給她過夜休息，但被她拒絕；另一日又約她到澳門出席聲稱是黃柏高的生日會，但要過埋夜，她沒答應；其後又約她到Garry的寓所見面，她覺得有可疑，故回絕對方。
8月8日
Suetzi終識破Garry冒稱是太陽娛樂文化高層，驚覺被涉嫌騙財，在好友莊端兒陪同下到尖沙咀警署備案。
文：音樂組