祖兒叫克勤笠罩開騷
樂壇天后容祖兒夥拍李克勤的《容祖兒李克勤演唱會2015》，將於下月十一日起在紅館舉行。由於各界反應熱烈，早前宣布加開十九至廿一日三場，門票火速售罄，為應付撲飛潮，主辦單位再度加開廿二號一場，並於昨早公開發售。昨日早上在尖沙咀通利琴行售票處門前已聚集數十人排隊，開售不到五分鐘，最貴的七百八十元門票已沽清，十五分鐘後職員就稱門票已全部售罄，認真快過打針。
向歌迷致歉
對於演唱會加場的門票又被「秒殺」，李克勤接受電話訪問時表示開心之餘又要向歌迷致歉：「見到好多歌迷喺網上留言，話今朝明明係排頭幾個，但都買唔到最貴啲飛，真係超唔好意思。」同時又呼籲歌迷勿買黃牛飛：「我想完騷之後研究吓，希望日後可以改進賣飛制度，等歌迷唔使咁辛苦。同埋希望所有人唔好買黃牛飛，逼佢哋要原價賣番出嚟！」
至於祖兒對門票再賣清表示：「啲飛就好似我條腸同消化系統一樣咁健康，一陣就咩都消化晒！我真係好開心，為答謝咁多人支持，會努力做好準備，做好個騷。為慶祝門票賣得咁好，我強烈提議到時克勤用《蒙面歌王》（內地節目）白棱鏡嘅造型出場。」
文：音樂組