周潤發年賺1.4億：拍戲非為錢
神級影帝周潤發自入行以來首度入選美國權威財經雜誌《福布斯》（Forbes）2015年度「最高收入男星」（The World's Highest-Paid Actor 2015）排行榜，他以1,800萬美元（約1.4億港元）收入位列第二十四位，發哥則指自己不問收入：「我拍戲都已經唔係為錢。」
《福布斯》最新公布了2015年度「最高收入男星」排行榜，最近正忙於拍攝電影《賭城風雲3》的神級影帝發哥，以1,800萬美元（約1.4億港元）收入入選，穩佔第二十四位。
行山度日唔大使
今次是發哥從影多年來首次登榜，發哥對此表示：「錢啲嘢，你唔好問我，舊年搵幾多，我真係唔知，要問問周太先至知。其實我拍戲都已經唔係為錢，其實我只係鍾意演出，有好劇本好製作，我唔使錢都可以做，不過阿太一定唔會畀。其實拍每部戲我都好enjoy個過程，係錢買唔到。」發哥話平時都係行山度日，都冇乜機會用錢，銀包都放好少錢。
羅拔唐尼排榜首
而排行榜首的是飾演「鐵甲奇俠」的荷里活男星羅拔唐尼（Robert Downey Jr.），他過去一年的收入高達8,000萬美元（約6.2億港元）。另外，還有之前公布的成龍則以5,000萬美元（約3.9億港元）的收入名列第二位，雲迪素（Vin Diesel）排行第三，第四位由《美國狙擊手》 （American Sniper）男主角畢利谷巴（Bradley Cooper）奪得。
文：名人組