盧頌之涉醉駕被捕 分手冇錢賠
昨日網上流傳一條撞車短片，據悉事發為上月廿五日凌晨，肇事車輛嚴重損毀，司機涉嫌醉駕被捕。車主為電台DJ陳達仁的胞弟，事發時同在車上兼受傷的陳達仁就聲稱當時係由（口靚）模盧頌之（DaDa）駕駛，而事發後DaDa本曾承諾會賠償，不過其後女方又指自己跟男友趙勁皓（King）已分手，經濟出問題而暗示不願賠償。
（口靚）模盧頌之（DaDa）自早年跟趙勁皓（King）拍拖後，專心做跟得女友，但昨日《東網》在網上發現一條拍有DaDa撞車過程發生的短片，據知事發時間為上月廿五號凌晨，而肇事車輛為四十萬的Audi A5私家車，登記車主屬電台DJ陳達仁的胞弟。
面紅爆粗鬧拍片
據知短片由坐乘客位的人士所拍攝，約分半鐘長的短片中可見滿臉通紅的DaDa，身穿白色上身衫駕車，前後座尚有共兩名男乘客，期間DaDa就大聲爆粗稱：「又拍片，你醉X咗啦！」後排乘客不停大叫好驚，忽然一聲巨響兼畫面一黑，安全氣袋彈出，數秒後有女子開口問：「我哋係咪撞咗車呀？」另一把男聲答：「係呀。」片段就完結。
記者及後致電陳達仁，他承認日前在青山公路近青龍頭迴旋處發生交通意外，車主為其胞弟，事發時由DaDa負責駕駛：「我當日同DaDa做完節目，然後同另一個男性朋友去飲嘢，但全程我都冇見到DaDa有飲酒，到離開時佢主動話幫我揸車，點知差不多返到屋企時發生意外。」
陳達仁骨折留院
因右上臂骨折已出院的陳達仁表示，事發後DaDa稱會負責賠償，他說：「後來佢（DaDa）原來通過唔到酒精測試，之後DaDa再到醫院探我，問可唔可以分期畀番錢我，但隔咗幾日佢又同我未婚妻提議不如報保險，我未婚妻話涉嫌醉駕保險可能唔賠，佢話要同律師傾吓。」
陳達仁表示他的朋友後來亦詢問過DaDa賠償事宜，她卻指與男友已分手，經濟出問題無法賠償。但陳達仁稱DaDa未有親口向他說無錢賠，自己因傷工作安排都大受影響，現在已將事件交律師處理，不方便直接聯絡她亦不會再回應相關事宜。而DaDa本人透過短訊回覆本報承認曾發生意外，並稱事件已交由警方調查及律理處理，不作進一步回應。
而據警方消息，亦確認上月廿五日凌晨時分接獲交通意外報告，司機為廿五歲女性Lo X Yee（DaDa原名盧燕宜）報稱閃避切線車輛失控撞欄，同時司機未能通過酒精呼氣測試，涉嫌酒後駕駛被捕。
文：音樂組