關詠荷相夫教女愛字行頭
有人為事業而放棄家庭，關詠荷（Esther）就為家庭而淡出娛樂圈，專心相夫教女，家庭永遠都是放第一位，將時間奉獻給寶貝女，見證她的成長。Esther無悔當初的選擇，只想為心愛的人提供一個美滿的家，培養一份真摯的感情。
關詠荷（Esther）與張家輝結婚逾十年，育有一女張童（Brittany），Esther與家輝一直都是圈中的模範夫婦，男主外女主內，Esther過着相夫教女的美滿生活。Esther曾是無綫當家花旦之一，為家庭而放棄事業，淡出娛樂圈，成為賢內助，將全副心機放入家庭之中，照顧9歲寶貝女Brittany成為她的重任，她對女兒亦有自己一套規矩及方式，為了令女兒有美好的成長，她不時化身「關詠哦」：「提囡囡要刷牙，佢覺得好煩，對住女都要不厭其煩，要長氣，要保持好，每一步都要照顧佢。」
父母角色 提供機會
「養兒一百歲，長憂九十九。」不少家長為了子女不要輸在「起跑線」上，不自覺變成「怪獸家長」，Esther對此有另一看法，她表示作為父母愛錫子女是必然，不需要用「怪獸」來形容家長：「兩睇，學嘢要睇小朋友吸收能力，有啲同學有媽咪跟實，成績係好好。囡囡有學樂器，但佢係唔push得，我會畀佢去試，睇佢覺得點樣，睇佢願唔願意去繼續，作為父母係提供畀佢嘗試嘅機會，接唔接受到睇佢自己，我覺得唔需要用怪獸形容家長，做咗父母就會明白。」
Esther將自己的時間奉獻給女兒，自己的睡眠時間亦因而減少，她說：「以前會帶佢返學，就算唔返學都會陪佢食早餐，開頭嗰5年，我係唔夠瞓，因為佢習慣唔到自己瞓，佢會過嚟我房搵我，咁我就要帶佢返入房，之後慢慢大個就唔使，佢會叫我『媽媽唔使送我返學』，我就去接佢放學，可能佢覺得我好煩，因為每朝我就問佢頭髮整好未？校服着好未？」雖然女兒現在已不太黐身，但Esther反而要擔當其他的角色：「因為佢冇兄弟姊妹，我要做埋姊妹嘅角色，發生啲乜事，我都要指導佢，好似要一齊睇電視，有錫嘅戲，佢哋喺度做乜，都要喺適合時間去指引佢，要喺佢身邊，同佢一齊成長，要同佢作息時間一樣。」Esther回想起女兒成長，點滴在心頭。
悉心打造 和諧之家
有人說「女兒是爸爸的前世情人」，Esther亦認同，因為女兒視她為嚴母，她說：「惡嗰個係我，而老公永遠乜都得，小朋友識得去搵乜都得嗰個，對爸爸有所求嗰陣就會嗲佢，我哋就知佢有事要求。」提到張家輝呻暑假被太太撇低，帶咗囡囡去旅行，她笑言：「老公要開戲唔去得，小朋友要出去睇吓世界，順得哥情失嫂意。」有個賢淑太太，難怪丈夫放心在外打拚。
Esther放棄事業去打理一個家庭，得到一位愛錫自己的丈夫，張家輝曾說過Esther是滿分好老婆，公開讚她說：「如果100分滿分，梗係畀100分啦！冇老婆就冇我呀！佢畀好多自由度同空間我，所有決定佢都唔會干預。」這句愛的宣言更令賢內助一直緊守崗位，為丈夫提供一個和諧之家：「佢唔係咁鍾意熱鬧，一個人做完嘢，拚搏完，最重要返到屋企和諧、舒服，我會做好呢一樣，偶然會下廚獎勵佢。」就算要Esther重新選擇，她亦會選擇以家庭行先：「因為兼顧唔到咁多嘢，係要付出啲嘢，而且感情係需要培養。」現在女兒長大，她又可重新工作。
復出拍劇 冇閂過門
兩年前Esther久休復出拍攝了電視劇《情逆三世緣》，女兒漸漸長大，她一直都有考慮復出拍劇：「做娛樂圈需要時間，畀到好角色，時間上又安排到我冇問題，好似之前拍劇都早半年畀我準備，角色又OK，我一直都考慮(o架)，冇閂過門。」
文：李詠林
攝：張福宏