田蕊妮陳凱琳不 打不相識

初見嚇窒

G：陳凱琳 田：田蕊妮

提到兩人在想像中對對方的第一印象時，Grace直指阿田令她好緊張，令平時精靈又醒目的她都瞬間被「擊倒」！

G：阿田令我好緊張，你唔知道我會緊張，但我其實真係好緊張！

田：喺我想像中嘅Grace係一個唔怕醜，好識同人溝通，識面對任何場合嘅一個女仔嚟！變咗我喺佢面前都唔修飾，講咩就講咩，都驚我會嚇驚咗你！

G：我覺得阿田係無論對住邊個，性格都係一樣，個人好直。我成日都覺得唔想喺你面前出醜，唔想做錯或者講錯嘢。好似上次做頒獎禮司儀（《2015 TVB最受歡迎廣告頒獎禮》），阿田一出到嚟我就對你講咗句「我同你好襯呀！」點知阿田答我：「你唔係應該同另一個人襯o架咩？」我即刻嚇咗嚇！平時我遇到呢啲情況會好醒可以即刻回應到，但當時我真係呆咗唔知講咩好！

田：係囉，嗰吓我仲諗：「死喇！我係咪嚇親一個新人呢？定係我hurt咗佢呢？」因為我見佢一嚟就好熟咁話我哋好襯，咁我就順勢喺個台度搞吓笑啦！喺我個角度嚟講呢個玩笑係好微細，我見佢突然呆一呆，我就細細聲問佢係咪好緊張？

G：我當時即刻扮晒唔緊張，話自己好忙、好多嘢做先會咁！嗰日阿田係做嘉賓嚟出席，咁我做MC都要搵啲嘢嚟講吓，咁啱我同你都着黑色，先懶醒咁同你講笑，點知個回應令我嚇咗一跳，好unexpected，搞到乜都唔識講。之後其實喺稿度都有度定一句阿Ben（黃智賢）同我Chit-chat會提到「鄭生」，當時已事先知道佢會講，大家夾好咗，點知嗰陣我已經反應唔到，淨係想叫大家唔好再蝦我，哈哈！

陳凱琳讚田蕊妮爽朗性格最得人歡心。	田蕊妮於《巨輪》演倀雞英一角，形象深入民心。	田蕊妮與陳凱琳早前為《巨輪II》試造型，勢必好戲連場。

男女通殺

在真正見面之後，阿田表示Grace與自己想像中的印象一致，而Grace則謂阿田與想像中的「倀雞」相當不同！

田：我覺得Grace都依然係同我印象中一樣咁聰明，我睇到你個眼神係好似所有嘢都好在狀態，你每次出到嚟都係好似準備好晒咁！

G：我對阿田第一個認識就係做一個觀眾睇你嘅劇集，最深印象真係你喺《巨輪》入面做「姚文英」，嗰陣你做戲真係唔會令人覺得係做緊戲，睇嗰陣都覺得你真人都一定係咁「倀雞」，呢個角色仲要係好難做，畀第二個真係未必做到，對你嚟講真係冇難度。明顯同你真人都係好唔同，你本身成熟好多！我覺得你最大嘅優點係好爽朗，特別係女仔好多時會覺得要好嗲、好sweet先吸引到男仔，但係阿田最吸引人係你有好爽朗嘅性格！

田：哈哈！咁我會唔會吸引咗地球上另一啲生物呢？

G：喺地球上嘅男同女都咁鍾意你！有時某啲女仔會令到其他女仔唔想同佢做朋友，可能係覺得佢好假，但係阿田係令到男女都鍾意嘅人！

陳凱琳

服裝：French Connection

鞋履：Kurt Geiger

文：陳丹攝：黎志輝