陳瀅主動出擊同吳若希爭食
「大隻仔」溫家偉早前與女神吳若希接連約會，苦追多時似乎叫胡，正以為守得雲開，怎知「瘦田冇人耕，大隻多人爭」，新一代女神陳瀅日前殺落雪糕舖，和大隻仔旁若無人地黐到實一實玩自拍，兩人如孖公仔於店內做生招牌。正當他們在舖前溫馨，後面又有另一對煙韌小情人，湯洛雯在店內餵羅天宇食雪糕，你一啖我一啖相當冤氣。
樣貌標致的陳瀅近年於TVB劇接劇，今年更成功藉《四個女仔三個BAR》上位，奠定新一代女神地位。出道以來緋聞不多的陳瀅，原來對大隻男情有獨鍾，最近更不惜和吳若希拗手瓜，主動接近大隻仔溫家偉。
湯洛雯羅天宇斷正
日前下午3時多，陳瀅於尖沙咀出席完活動後，先到髮型屋扮靚，然後再去行街及食小籠包醫肚，突然即興殺入溫家偉的雪糕店。陳瀅甫泊好車，已見溫家偉離遠奔跑過來迎接，殷勤招呼，更第一時間走入店內，親自裝了杯招牌雪糕冧女神。陳瀅拿過溫家偉送上的雪糕笑不停，食了兩啖便主動取出相機要合照，二人黐到實頭貼頭，溫家偉繼而再將頭枕在陳瀅膊頭拍照，親近一番，然後站在店外傾偈。及至有街坊認出上前要求合照，他們又如孖公仔般有求必應，幫舖頭做晒生招牌。
正當陳瀅和溫家偉在舖面卿卿我我之際，另有好戲在後頭，湯洛雯竟在店內餵羅天宇食雪糕，一對小情人你一啖我一啖，旁若無人。湯洛雯餵完羅天宇食雪糕，突然又起身幫男友拍照，順便又自拍多幾張。
唔怕吳若希呷醋
未幾陳瀅和溫家偉加入，做了湯洛雯及羅天宇的電燈膽，四人圍在一起傾偈，溫家偉頻頻講笑話，氹得陳瀅頻露甜笑，熱情的他亦一度捉住湯洛雯的手傾不停。陳瀅於店內逗留約大半小時後，湯洛雯和羅天宇一對嗌走，只見湯洛雯即避忌地戴上口罩，而陳瀅亦不好意思多留，往取車回家休息。
記者致電溫家偉，問到陳瀅主動接近之事，他哈哈傻笑一番，然後說：「我哋兩個係好朋友，嗰日陳瀅搵唔到間舖我先專登去接佢。（驚唔驚吳若希呷醋？）吓！哈哈哈！應該冇嘢！（如果陳瀅同吳若希兩個ＡＢ餐畀你點揀呀？）嘩！我唔識答喎！你唔好叫我揀啦！」繼而尷尬傻笑。
文、攝：追蹤組