楊秀惠姣得出色觀眾Like

藝人陳豪、田蕊妮、楊秀惠、胡定欣等，昨日為無綫劇《鬼同你OT》宣傳造勢。劇中演性感「蜘蛛精」、常主動出擊勾引陳豪的楊秀惠，憑生鬼演技受觀眾歡迎，可謂姣得入型入格。問到她出街可有被觀眾鬧？楊秀惠表示：「冇畀人鬧，出街啲觀眾見到我都好Nice，好開心咁叫我蜘蛛精。自己唔介意，好似多咗好多朋友咁。其實當初接到角色有啲擔心，但依家啲觀眾好聰明知道只係角色，唔擔心會被定型。」

定欣險揩花座駕

而胡定欣則承認最近與音樂人男友陳明道到新加坡度假：「依家係放緊假，趁有時間去旅行。（旅行甜蜜嗎？）總之開心。（擺脫港女稱號，望35歲前嫁？）每次都係用呢啲字眼放喺我嘅感情生活上，習慣晒，總之佢好珍惜我，係位好男士、好男人。（公開戀情壓力冇咁大？）一向都冇壓力，只係想穩定啲再公開。冇話恨唔恨嫁，女仔去到適婚年齡就會想搵個適合嘅人。（男友係結婚對象，有共識？）未有共識，大家只係一齊半年多，出年就35歲會畀心機。」

陳豪（左）及田蕊妮扮鬼臉為新劇造勢。

譚凱琪（左）與張名雅以透視裝搶鏡。

而同場的張名雅就於微博指座駕與定欣的車「錫錫」，暗喻雙方座駕有輕微擦過，幸未留下「愛的烙印」揩花架車。定欣亦在微博回覆「無事無事」。

陳豪出自家咖啡

至於陳豪講到投資的咖啡品牌則大賣關子，說因商業關係要年尾才能公布：「今次可以話係夢想成真，咖啡品牌生意研發中，唔方便講太多。（好大投資？）ok啦。（減產拍劇？）唔會，拍劇係我老本行。（陳茵媺有冇幫手？）佢要睇住兩個小朋友，愈接觸佢哋多愈覺佢哋可愛，上天畀咗好嘅人生我，有好嘅老婆，仲有兩個可愛囝囝。」

文：影視組