譚耀文減20磅 操麒麟臂掘金
藝人譚耀文（阿譚）日前密密打籃球操出結實麒麟臂，於一年內狂減廿磅的他更明言要以最佳狀態赴內地拍戲掘金！談到「的起心肝」操fit的原因，阿譚竟自爆當時身形暴脹時慘被拍檔任達華傷透心：「佢一見我就問我『係咪有病呀』！好多謝佢呢句說話。」
譚耀文（阿譚）最近靠打籃球及上堂做gym，成功操出魁梧身材及強勁臂彎。現時與「中年發福」扯不上關係的他，自爆一年內狂減廿磅肥肉，背後原因竟是他慘被拍檔任達華出言hurt爆！他說：「我返咗內地拍劇後再返香港拍戲，佢見到我就問『你冇嘢呀嘛！你係咪有病呀！』其實嗰時我已經減緊（肥），竟然畀佢正面咁hurt一句，但好多謝佢呢句說話。」
孖城城鬥做運動
阿譚坦言當時頓覺自己又肥又論盡：「我當時趕返香港拍《救火英雄》，喺機場時個行李箱甩手差啲撞到人，我最後捉到行李但拗柴。我去到片場演拐吓拐吓嘅角色仲畀人讚專業，其實我唔敢講真係整親，不過咁可以令我更投入拍攝！」阿譚又透露其後於電影中與郭富城演對手戲，熱愛健身的二人不時較勁鬥fit：「佢收工後唔理幾點鐘都會做45分鐘運動先瞓，我就學埋佢，大家每日開工前都會check對方有冇做運動！」
新片飛車爬懸崖
工作不斷的阿譚表示九月會同時拍兩部電影，據知其中一部中港合拍的真人騷電影會為他帶來七位數字酬勞。他更大爆屆時會以最佳狀態挑戰攀爬懸崖的危險場口：「部戲以真人騷方式拍攝，會有飛車同爬懸崖等場口！（用替身？）如果睇到清楚嘅安全措施，咁梗係要自己做番！」
文：影視組
場地：南華體育會Inn Side Out餐廳
髮型：Oscar Ngan@ii hair & nail
化妝：Terence C.
服裝：adidas