Ashina以淚洗面裸到抑鬱
為新片全裸的郭奕芯（Ashina），除要露盡三點，更要場場爆喊，令她差點患上抑鬱症。自言拍戲有壓力的她，透露在初期表現最差，幸得導師蝦頭「點醒」，最終進步神速，大功告成。
藝人郭奕芯（Ashina）近日為新片全裸上陣，驚爆差點患抑鬱！近日走出陰霾的她，接受本報訪問時，透露當日劇組安排眾演員跟楊詩敏（蝦頭）學戲，豈料Ashina的表現最差：「當時唔知點解走唔出框框，表現好差，連蝦頭都忍唔住問我『點呀？』我即刻又喊過。蝦頭真係好畀心機同時間幫我惡補，令我進步唔少。」Ashina又自言似「悲情女主角」，於戲中由頭喊到落尾：「幾乎每隔一日就喊一次，有時只得30秒至2分鐘畀我培養情緒，壓力真係爆煲。」提到全裸部分，她自爆心情其實七上八落：「全裸都有壓力，其實好擔心，好在另外兩位女主角心情同我一樣，我哋有拎出嚟傾互相扶持。」
勤運動多傾訴
Ashina自爆有段時間沒法抽離角色，險患抑鬱：「成套戲都係爆喊，好辛苦。一場戲要喊7、8次，有時收工返屋企，情緒都Keep住低落，拍完全裸又要拍喊戲，真係喊到個人有少少抑鬱。」最後Ashina多做運動及向朋友傾心事，才擺脫抑鬱之路：「冇睇醫生，因為如果部部戲都係咁，我就唔得掂，所以嗰陣靠多做運動，同朋友傾多啲先冇嘢。」
宗堯讚有潛質
曾與Ashina合作過兩次的王宗堯，盛讚Ashina是有潛質新人但難免緊張：「我同導演傾過覺得佢要專心啲同投入啲。」對於Ashina被傳拍全裸戲致抑鬱，王宗堯坦言不知情：「嘩，乜個個都抑鬱？唔知喎，唔覺佢特別唔開心，佢本身都鍾意講嘢，係個開朗少女。」
文：專案組
攝：劉斌
場地：Sand House HK
泳衣：Roxy