「過來人」李彩華:小店畀現金

圈中不少藝人如李彩華、范振鋒都曾遭人盜信用卡用,而鄭希怡亦有做網上購物生意,對於有甚麼方法可以防止及加強保密措施,他們都有不同意見。

李彩華

「之前去歐洲一間鞋店買嘢,用信用卡付款時搞咗好耐。後尾收到信用卡中心電話,話我張卡喺香港以外地方有個可疑簽帳。所以我之後喺外地簽帳會比較小心,如果係一啲小店通常都畀現金,盡量減低被盜用嘅風險。」

鄭希怡

「我間網上時裝店一直選用香港有信譽嘅公司管理顧客資料,開業至今年多都未有出問題,或接到顧客的投訴電話。不過都叮囑網上購物嘅人都要小心處理個人資料,避免外洩機會,因為現今網上騙案非常嚴重,但慶幸我未遇上網上騙案。」

張惠雅

「近日不停有呃錢事件,戥陸詩韻唔抵同慘,佢乜都冇做過,不過冇辦法呢啲係意外,依家有太多古怪騙案,只要唔識嘅電話我都唔會聽。」

范振鋒

「當年係突然發現張卡碌唔到,先知被人盜用仲碌爆咗張卡。之後自己會查卡數查得密啲,唔好被人盜用咗仲幫人還埋卡數都唔知。另外,聽講如果懷疑張卡被人盜用咗資料,嘗試同銀行商量換張新卡,以免有所損失。」