沙拉保夫喊殺女友 Call美瑾霍絲降火

現年29歲的沙拉保夫與年輕他7載的英國女星Mia Goth拍拖3年表現恩愛，月前更傳出兩人已秘密訂婚。上周五Mia於德國蒂賓根拍攝新片《A Cure for Wellness》，沙仔做跟得男友往探班，被目擊於當地酒店門口的士站大吵一場，數名當地男子拍下整個過程，後來見沙仔撇下女友離去，還主動提出讓他坐順風車到機場，Mia見沙仔上車即衝前搶走其背囊留着他，反令沙仔發脾氣大罵：「我唔想掂你，我唔想咁躁，就係呢啲衰嘢令人變得粗魯！」沙仔不停求Mia還他背囊，最終Mia屈服讓他離去。

返德州無家可歸

沙仔往機場途中繼續瘋狂，他自言自語鬧不停：「我唔想打女人，係佢逼我，如果留喺度，我會殺死她（Mia）……好辛苦呀大佬，搞到我個心亂X晒！」沙仔更癲到拿起手機搵一向支持他的舊愛美瑾霍絲玩Facetime，對方並無接電話，他只好無奈地點煙，餘下車程就與同車的人討論買槍話題，又透露將去德州，又自稱無家可歸，還指着個背囊說「呢個就係我屋企」。

Mia眼睛有瘀傷

到機場後，沙仔入鏡與眾人玩自拍跟幾位新朋友說：「你哋嚟洛杉磯，我揸車接送，畀你哋住我屋企。」有人發現沙仔手部受傷，建議送他到醫院治理，他多謝對方說：「你救咗我一命。」有報道指Mia翌日外出時其中一隻眼有瘀傷，未知是否遭沙仔家暴，但亦有指沙仔與Mia爭執時全程無掂過對方。

沙仔與Mia於2012年因拍電影《性上癮》（Nymphomaniac）系列時撻着，去年10月更結伴現身沙仔新片《戰逆豪情》（Fury）首映禮，為兩人首次結伴出席公開場合，今年3月Mia更戴着鑽戒拍拖，被指與沙仔已秘密訂婚，未知今次爭吵可會影響兩人關係。

文：外娛組