龐卓欣愛得張揚三式箍男友
大熱港姐(4)「寸嘴Ada」龐卓欣參選以來一直戀愛大過天，不時於社交網站發放和男友的親密合照。由於連日緊密排練減少拍拖機會，日前Ada出席完公開活動後，先約一名女性友人攝時間，及至男友現身，她即熱情如火地送上「箍仔三式」──拖手、翹臂兼攬頭，最後癡纏地攬實上車走人。
今時唔同往日，以前選港姐必定密冚戀事，就算有拖拍都一於死口唔認，總之寧畀人知莫畀人見。直至近年社會風氣愈見開放，就算作為今年大熱門的「寸嘴Ada」龐卓欣，亦從不隱瞞戀事，早前主動於社交網站發放和富三代男友Solomon的幸福閃光彈，當中包括穿上泳裝的火辣錫錫相。
縱使戀愛大過天，可是近月密鑼緊鼓的港姐排練，加上早前又要往日本拍攝外景，Ada無奈和男友分隔兩地，難怪回港後即急不及待爭取機會見面。
與女友人食雪糕
日前下午三時，港姐佳麗於沙田出席完公開活動，Ada隨即便跟大隊乘車到九龍塘港鐵站，然後轉乘港鐵到灣仔。於車廂中，Ada大部分時間做低頭族，不停撳電話，及至去到灣仔，她先會合一名女友人，兩人結伴到附近雪糕店買雪糕，接過雪糕後，先讓相機饗餐，分享到社交網才站在路邊一人一啖舔雪糕。
雪糕還未吃完，Ada收到電話，然後急急和女友人截的士直驅西九龍一商場，兩女快步登上高級日本餐廳，似是相當趕時間。入內約兩小時後始見她們步出，此時Ada和女友人已經各自拖實另一半，原來Ada是搵朋友攝時間，等男友上場，其身邊正是男友Solomon，穿上緊身Tee的他，健碩體形一覽無遺，難怪Ada懶理候選港姐身份，翹實男友胸壓麒麟臂，兩人邊行邊傾，未幾便告別一對友人，變為溫馨二人行，並結伴到便利店。
逛便利店甜蜜蜜
兩人在便利店內邊揀嘢食邊傾偈，不時說說笑笑，Ada臉上一直掛着甜甜的冧笑，及至去到扶手電梯，原本和男友十指緊扣的Ada，突然熱情如火地箍實男友頭頸；至於男友則一臉陶醉，火辣辣的兩人齊齊往酒店取回男方座駕，一同上車離開，繼續享受二人世界。
文、攝：追蹤組