金愛妍Bra閉靠自己發達

現正創立自家內衣及泳衣品牌的韓模金愛妍（Kim），原來已非首次創業，曾於韓國弘大開設咖啡廳的她，當年更勁蝕七百八十萬港元損手離場。但一次失敗並未把她的創業夢擊退，吸取了上次的失敗經驗，她再次捲土重來，誓要靠自己發達。

韓模金愛妍（Kim）來港兩年，去年與日模清穗久美子組成「雙K」推出寫真，但今年暑假Kim退下寫真戰場，改為推出自家品牌內衣及泳衣，實行「升呢」為老闆，邁向發達之路。

「我今年唔會出寫真啦，依家專注於籌備我嘅內衣同泳衣品牌，希望喺七月或者八月推出。我當然好鍾意做模特兒，不過做模特兒始終都唔可以好長久，而且我目標係發達，所以要自己做生意！」

「我對呢單生意好有信心，一來我係模特兒，試過好多唔同品牌嘅內衣，好有心得。而且我每件事都會親力親為做，好似選料、設計、生產過程等，都係親自返韓國監督，仲會自己做生招牌，依家韓風咁勁有優勢。今次投資咗一百萬美元（約七百八十萬港元）落去，希望可以喺一年內做到收支平衡，再賺大錢！」

對創業充滿雄心壯志的Kim，原來並非首次創業，曾於韓國開設咖啡廳的她，當年損手離場，勁蝕七百八十萬港元，但她從錯誤中吸取教訓，並套用在第二次創業中。

「我喺兩年半前同家人喺南韓嘅弘大開咗間咖啡廳。當時喺韓國好流行，大家一窩蜂咁開。但就喺同一區開好多間咖啡廳，太多競爭對手，大家都調低價格，做爛市，所以最後都做唔住執笠。我哋當年投資咗二百萬美元（約一千五百六十萬港元），最後蝕咗一半。」

「不過呢次係好好嘅經驗，嗰時喺咖啡廳度幫手，除咗做侍應、收銀員，仲學識咗沖咖啡，同埋我發現做生意唔可以太鹵莽，事前要做多啲資料搜集先。上次開咖啡廳，每個月要畀租金同水、電、煤費，成本好高，所以今次搞內衣同泳衣品牌，我會先放喺網店度賣先，咁可以減低成本，等我嘅品牌有穩定嘅客源，先至開實體店。」

其實樣靚身材正的Kim，大可以找個富貴男友照顧，疊埋心水做個少奶奶，毋須奔波勞碌。對此，目前單身的Kim笑言自己是「外貌協會」，不求男友富貴，但卻希望對方高大靚仔。

「其實我嚟咗香港之後，有試過同香港男仔拍拖，我覺得香港男仔好有紳士風度，不過好可惜我哋性格不合，所以好快就分咗手。我真係好鍾意香港，想喺呢度長住，所以都想搵個香港男朋友，仲可以教我廣東話。」

「我今年已經27歲，雖然仲好後生，不過我好想快啲結婚，最好今年或者出年內結得成，想快啲有人照顧我！喺揀偶條件方面，我最緊要係對方尊重我同照顧我，同埋一定要高，最好就靚仔！至於對方嘅身家，我就完全唔介意，因為我好有信心自己都可以搵到錢，自己使自己賺嘅錢，仲開心過畀人養啦！」

Kim於韓國的大學修讀模特兒學系出身，除了學習化妝、穿着技巧及行貓步外，亦要求學生學會畫時裝草圖。而是次創立自家品牌，Kim更能一展身手，她笑言：「好彩當年學過畫草圖，所以今次我設計內衣同泳衣，都係自己親手畫，都畫得似模似樣(口架)！」

文：龔凱欣　

攝：劉斌　

服裝：TOPSHOP

場地：LUX

金愛妍Bra閉 靠自己發達