李璨琛保住頭家：會檢點啲
早前攬女斷正的李璨琛終現身解畫，稱屋企未有受報道影響，現時家庭和諧，三度強調「會檢點啲」！而佗住七個月巨肚的湯盈盈就自爆今次佗B唔乖，飲食又寒又辣，但會好好指導剛懷有身孕的姊妹姚樂怡。
藝人李璨琛（Sam）、蘇志威、湯盈盈、吳家樂、梁漢文、文頌嫻與女兒及洪天明一家三口等前晚現身「冰上動感冰河世紀LIVE！香港站長毛象大冒險」音樂劇首映禮，其中李璨琛、蘇志威及梁漢文等更為音樂劇擔任配音。
談到已婚的Sam早前被《東網》踢爆背妻「出巡」夜店攬女，Sam解釋出去玩時有親密接觸在所難免，又說當晚幾杯落肚，有點微醉，問到拍得他與索女又攬又錫，Sam直言：「自己會檢點啲。」當記者再追問可有因此被老婆怪責？以後會否少出去玩？老婆有否與他約法三章？自知今次行為不檢的Sam強調：「依家家庭和諧，冇影響到我哋感情。」並再兩次承諾：「我會檢點啲！」
湯盈盈巨肚唔戒口
而懷有七個月巨肚的湯盈盈帶住囡囡出現，她笑言六個月時醫生已經話巨肚超重，所以現在要控制飲食：「我呢胎懷得好壞，又食辣嘢，有時啲梳打嘅甜嘢，老公喺隔籬飲我都會忍唔住。」講到老友姚樂怡榮升準媽媽，她即恭喜對方，並會傳授心得給初為人母的姚樂怡。
李霖恩盡量少飲酒
另外，同場的藝人李霖恩一家大細出席首映禮，講到早前醉駕罪成，他坦言有向女兒直說事實：「我同咗個女講，Daddy飲咗酒揸車犯咗法，今年接送唔到佢，要媽咪開車，係一個反面教材，佢哋都知，有時會叫我唔好飲酒。」他又講到有事應酬仍要飲酒，不過以後會盡量少飲。
文：音樂組