蕭正楠明嗒孟瑤劇鬥翠如

蕭正楠(Edwin)在劇集《風雲天地》中與性感女星孟瑤演夫妻,面對性感尤物而且不乏咀戲,另邊廂,Edwin女友黃翠如演的《愛‧回家》亦熱播中,看來兩人要暫時放下愛情鬥收視。而對於被翠如媽媽形容為《風》劇中的「敗家仔」,Edwin不但沒有不快,反而勁受落!

蕭正楠與黃翠如最近同有劇集播放,Edwin指翠如亦有看他演的《風雲天地》:「佢阿媽仲話我扮敗家仔扮得好似,我聽到冇唔開心,反而覺得好高興,因為佢哋鍾意睇我嘅演出。我個角色就係敗家仔,好多女性觀眾會對呢類角色反感。(唔驚影響形象?)佢壞唔晒,尾段會變番好。」

王晶讚搞笑

談到與性感女星孟瑤合作,Edwin謂:「我同孟瑤有好多令人笑到碌地嘅演出,聽講監製王晶都話我有喜劇天分,好多謝佢畀機會我搞吓笑。(同孟瑤合作唔尷尬?)唔尷尬,親熱戲都係蜻蜓點水。另外,今次可以同汪明荃等一班前輩合作,開心之餘又學到嘢。」

甜蜜睇劇本

對於《風》劇收視暫屈居於翠如有份演的《愛‧回家》之下,Edwin稱:「戥佢開心,打風嗰晚仲創咗紀錄。有叫佢加油,要多多向張繼聰學習,嚟緊《風》劇都好緊湊!(翠如話你哋平日會研究劇本?)係,我哋少出街,留喺屋企煮吓嘢食,之後就睇劇本,做筆記,有時睇到好嘅場口、對白會攞出嚟研究,呢輪我就鑽研緊《巨輪II》嘅劇本,好期待正式開工。」

文:影視組

攝:唐豁莊

服裝:G-STAR RAW