陳凱琳戀嘉穎：好快樂！

「近年公司畀咗好多拍劇機會我，我好鍾意拍戲，唔會覺得辛苦，就算之前拍劇整到對腳瘀晒，我都唔會覺得係咩。我唔係一個唔捱得嘅人，好享受演戲嘅過程。其實我細個時從來冇諗過自己會拍戲，選香港小姐就係我嘅夢想，對於拍戲我嘅心態係如果有得嘗試就會好投入去做，結果拍吓拍吓就上咗癮，好鍾意嘗試各種唔同類型嘅角色。」

40粒鐘拍到嘔

「拍戲好多時都會不眠不休踩好多個鐘，我最犀利一次係拍《張保仔》時試過四十個鐘冇瞓覺，要拍兩個廠景，最後係病咗，又頭暈又嘔，要返屋企瞓幾個鐘，嗰次之後令我知道自己嘅極限去到邊。我當時係拍拍吓外景，感覺到自己有啲頭暈，就叫PA買啲藥畀我食，點知一食完藥飲咗啖水就嘔，覺得好唔好意思，就繼續頂硬上。後尾係導演話唔對路，要我返屋企休息，嗰陣我先深切體會到原來休息係咁重要，先至知驚！」

陳凱琳愛品嘗美食，難得食極唔肥。	陳凱琳會睇場合着衫扮靚。	陳凱琳、鄭嘉穎戀情由合作拍劇開始，她多謝男友悉心教戲。

「所以依家我一有時間就休息、瞓覺，嗰晚我休息咗一晚個人就好番好多。我依然係好鍾意、好享受做演員，唔會因為咁就怕咗。返朝九晚五對我嚟講未必會舒服啲，我知道自己係揀啱咗。」Grace說：「我放假會好relax，鍾意睇戲，參考吓人哋點樣演戲，學吓人哋嘅演技，會思考佢哋嘅演繹方法。」

「喺演藝事業方面其實我咩都想嘗試，因為我太新，就連唱歌我都有興趣，不過現階段想做好演員先，專注拍劇，學習多啲，留意其他演員點演繹唔同角色。我之前同洪永城合作，大家都係新人，我哋嘅火花好得意，就係會一齊去試點樣演會好啲。同陳展鵬合作佢會帶我入戲，鄭嘉穎都會。」

感激嘉穎教戲

「拍劇時都試過有挫敗感，之前拍新劇《殭》，其中有一幕戲係同嘉穎做對手戲，嗰場戲我要喊，係用單機近鏡拍攝，我埋位之前已經培養好晒感情，但係正式開始拍時，我緊張到吞番晒啲眼淚，喊唔出！原本瞓喺度嘅嘉穎就坐起身，同我行埋一邊教我點樣投入番角色，叫我慢慢嚟，當時我好平靜亦都好感動，好自然就谷番啲眼淚出嚟，我真係好多謝佢。」

「我諗所有嘢都係講timing，拍劇認識嘉穎，到依家多咗時間同佢再傾多啲偈，了解到佢嘅為人，我都覺得呢個男仔好好，我哋目前都係想保持我哋自己嘅私隱，始終我哋係artist，都想大家關注我哋拍嘅劇多過感情關係，好多謝大家關心，我哋依家好開心，感情事就唔講太多喇！」

打扮要有風格

「我都好鍾意幫品牌擔任模特兒影時裝相，自己都鍾意時裝，喺加拿大讀書時有睇好多時裝雜誌，會睇星期一至日點配搭。我記得讀中學時，有一日我戴咗對黑色手套返學，有個男老師話我扮企鵝。我覺得適合自己嘅style係要有個人風格，例如睇完時裝雜誌，唔使抄足，可以睇吓屋企有冇可以襯到嘅item。我都試過着錯衫，好似短褲襯長boots，其實唔make sense，都唔知係夏天定冬天咁！我依家多數返廠開工，衣着打扮都盡量簡單，主要都係睇場合着衫扮靚。」

「我最有自信嘅look係着好啱身嘅牛仔褲襯高踭鞋、貼身tee，平日我都鍾意着緊身褲，好似爹哋啲vintage衫，係boyfriend size，再搭配accessories。唔一定要着得好貴好隆重先靚，香港小姐着衫冇所謂，我都好少着啲斯文、性感裙，自己行唔到性感路線。我天生就係咁瘦，我媽咪都好瘦嘅，我唔使節食keep fit，仲好鍾意品嘗美食。」

鳴謝：Longchamp

化妝：Soey Li