金剛承諾掉轉着T-back
田蕊妮（阿田）、金剛及張秀文等昨日為無綫節目造勢，主持人金剛於台上指收視達到50點，將會掉轉穿T-back祝捷！而為節目首次訪韓的阿田就霸氣揚言要老公杜汶澤出錢請去旅行：「佢啲錢喺我度，我自己開票！」
藝人田蕊妮（阿田）、金剛、張秀文及鄧佩儀等昨日於坑口，宣傳無綫節目《街坊廚神舌戰新台韓》。而該節目上星期收視高達27點，身為主持的金剛及阮小儀於台上笑稱若收視達到50點，金剛將會掉轉穿T-back示人，而小儀則以三點式祝捷！金剛直言希望節目長拍長有，更無懼輻射，渴望到日本拍攝續集。
自爆爛醉開工
問到今次為節目訪韓有何難忘事？金剛自爆被嘉賓曾志偉灌酒以致爛醉拍節目：「獎門人教我前輩同後輩嘅飲酒方法，我飲咗五、六杯就醉，惟有呆住拍節目！轉地點時我仲瞓着咗，真係老貓燒鬚！」
阿田首度訪韓
而阿田笑言為拍攝該節目而首度訪韓兼狂玩狂食：「第一次去，因為老公（杜汶澤）對韓國冇興趣。今次有藉口去食好嘢同買嘢！」她搞笑「埋怨」此行斬獲不多，因較難購買批發衣衫：「東大門賣批發衫，唔可以淨買一件。我同阮小儀夾住買，但大家style同身高都唔同，所以好難買！」問到阿田會否要老公「資助」旅費？她霸氣揚言要對方請去旅行：「直頭叫佢畀啦！唔係請我都唔得嘛！不過其實平時開支都佢負責，佢啲錢喺我度，我自己開票！」
同場以短裙上陣的張秀文（Sammi）化身助手幫金剛下廚，惟裙子太短而當場露出打底褲。事後她笑言特意穿上牛仔褲打底，以防走光：「一望鏡都知唔對路！（依家警覺性好高？）我反而着褲先易走光，一踎低就露底褲邊。」
文：影視組