陳琪：大家都想保護Celine
「美心妹妹」Celine的寫真照備受爭議，昨日發行商書展攤位更將寫真下架，圈中不少已為父母的藝人亦有關注事件。
陳琪：睇完啲相覺得媽咪防線唔夠緊，依家社會有唔同睇法，父母作決定前要諗多啲，依家社會風氣係唔着衫影相先有題材，小朋友係擺可愛樣，但影嗰個影得性感，我第一眼睇係靚嘅，但點解有啲角度會咁影？希望社會唔好再批評Celine同Celine媽媽，大家都想保護Celine，放過佢啦，第時Celine返學都會有壓力。
林盛斌（Bob）：有睇過啲相，但冇了解過意識問題，畀我就唔會影，同小朋友留回憶有好多方法，例如帶佢哋着得靚靚哋影家庭照，有時我都會同小朋友影家居照再擺上網，不過會小心選擇。（有冇人想幫囡囡出寫真？）唔會畀佢哋影，冇需要，犯禁嘅嘢我唔想做。
楊思琦：冇睇過啲相，好難評論，如果影出嚟係陽光同健康都可以。（畀囡囡影？）影出嚟健康、適合佢年紀嘅都可以。