王晶下封殺令：唔畀佢傷害我
王晶昨日聯同吳鎮宇、楊千嬅等現身監製新片《寶貝當家》記者會，對於近日壹傳媒旗下刊物先後對其作品作負面報道，怒火中燒的王晶揚言絕不畀機會繼續受傷害，故出於保護自己而拒絕該集團記者入場採訪，更指短期內也不會接受該傳媒採訪其作品，包括拍攝中的《賭城風雲3》。
王晶執導的劇集《風雲天地》近日於無綫播出，卻被壹傳媒旗下刊物先後踩其劇情內地化、暗示該劇演員整容，以及收視差等，有見及此，王晶下令昨日舉行的新片《寶貝當家》記者會不歡迎該傳媒採訪，雖然王晶方面已透過電郵通知該傳媒不必出席，惟昨日該傳媒亦有派員到場，惟經公關了解後也先後被勸離開。
王晶表示基於有部分傳媒不友善，故出於保護自己才有此行動，他謂：「我唔畀機會佢傷害我。（之後都唔畀佢哋採訪？）短期內都唔會，包括《賭城風雲3》。（主要原因係咩？）報紙都有寫啦！咁仲有其他刊物做咗啲好人身攻擊嘅嘢，既然佢哋用唔適當嘅方法傷害我，咁點解仲要畀更多機會你去傷害我？（係咪無限期？）要睇人哋表現，TVB唔接受佢哋採訪都冇執笠啦！」
吳鎮宇股海明燈
一人分飾兩角的吳鎮宇，透露僅獲發一份人工，指現時股市波動，惟有「袋住先」。問到是否很多股票揸手？他謂：「我驚自己忍唔住買，其實我一買就會冧，連黃子華都跪求叫我唔好買，我比師奶更師奶。」
鎮宇指片中其大宅乃參照已故天王Michael Jackson故居作為藍本，就連樓梯也參考五星級酒店來搭建。而千嬅則大讚小演員王詩齡比她想像中聰明，更謂：「今次畀我體會到點可以同個女溝通，有個女會點，都幾好，可以同佢似朋友咁傾偈，又可以打扮成公主咁。」
文：影視組