謝安琪重遊荔園 憶犀利父親
謝安琪（Kay）昨日在荔園拍攝由作曲家顧嘉煇為她創作的歌曲MV，期間不禁回憶起父親昔日在攤位為她贏獎品的溫馨經歷！而曾爆肺的Kay愛上與老公張繼聰夜跑，更幻想兩公婆被怪物狂追加快速度，想像力認真豐富！
歌手謝安琪（Kay）昨晨為「荔園Super Summer2015」主題曲《最初的快樂》拍攝MV，這首歌由「樂壇教父」顧嘉煇親自作曲，Kay說：「呢首歌係煇哥退休前嘅最後作品，好開心有佢幫我作曲，因為之前喺演唱會膽粗粗同佢要歌，估唔到佢好爽快就答應咗我，仲咁快寫好畀我。」她笑言大清早就到荔園準備拍攝，幸好不是中午烈日當空取景，否則整個人都會熔掉。
勸小朋友咪掟龜
當Kay走上旋轉木馬拍攝時，見穿上花裙的她小心翼翼騎上木馬，工作人員伸手在旁為她護駕，但驟眼看以為對她胸襲。談起荔園，Kay形容是港人的情懷，小時候父母經常帶她到荔園遊玩，更被爸爸的「父威」迷倒，因為父親為她在攤位贏了不少禮品，她說：「以前有啲小朋友會搵嘢掟池塘啲龜，爹哋會叫佢哋唔好咁做，我覺得爹哋價值觀好正確！」
夜跑頓變懸疑片
最近Kay密密在網上分享與老公張繼聰夜跑的照片，她坦言若沒老公陪跑，她寧願待在家裏，她笑說：「我好鍾意成條街冇人嘅感覺，感覺好好，好似得番我哋咁，我哋仲會幻想有怪物喺後面追住我哋跑，好似拍懸疑片咁！（一個人唔跑？）唔會喇，有佢喺度我先會跑，因為你見到佢拍完劇返嚟，仲花一兩個鐘做運動，好得戚咁，我唔可以畀佢一個人威晒！」Kay透露每星期都會夜跑四次，由家裏出發跑至大埔工業村，每次跑足一小時，她興奮自誇：「因為本身個肺唔好，但真係唔去跑都唔知自己咁跑得！」
文：音樂組