享樂團濃情墨西哥
香港樂隊享樂團平日最愛四出尋找美食，笑言世上「惟音樂與美食不可辜負」，早前享樂團更一行五人齊齊到銅鑼灣的咖啡店「覓食」，原本為咖啡慕名而來的享樂團在這兒更有意外收穫：「一開始都知道呢度啲咖啡好特別，點知原來仲有得食墨西哥玉米脆餅，因為喺香港真係唔係成日都搵到地方食，咁啱就喺度搵到，所以我哋即刻叫咗兩個唔同味道嘅墨西哥Taco。」
一口氣叫來的兩味墨西哥脆餅不負眾望，第一道「香杧沙沙配魚柳玉米脆夾餅」，五子就形容簡直無懈可擊：「杧果肉粒配埋新鮮炸起嘅魚柳，口感外脆內軟，仲更加突出魚柳嘅鮮甜，加上脆脆可口嘅玉米脆餅，真係好好食！」而另一道「墨西哥式牛柳薄餅卷」，五人就大讚超有墨西哥風情：「牛肉沙沙醬加埋芝士配上墨西哥軟餅，一啖咬落去真係好有喺墨西哥食緊嘅感覺，佢仲加埋原條辣椒，真係又辣又好食。」
