麥明詩龐卓欣演嘢遭孤立
【陳永峯日本直擊】昨日12位港姐佳麗繼續在日本受訓，兩大宿敵「高挑Charlie」(1)麥明詩及「寸嘴Ada」(4)龐卓欣慘被孤立，龐卓欣請食朱古力但冇人吼，麥明詩則冇佳麗願意埋身。一對宿敵因此竟化敵為友，互相訴苦。
無綫《2015香港小姐競選》12位佳麗昨早到東京一所排舞室，接受曾與美國歌手Britney Spears、台灣歌手張惠妹、蔡依林等合作的知名舞蹈家井上櫻教授舞蹈技巧，下午轉到上野一所貓頭鷹Cafe拍外景。麥明詩繼續鋒芒畢露，勁show quali，更與宿敵龐卓欣（Ada）齊齊被孤立。
請客慘食檸檬
麥明詩昨日在排舞室做熱身時，一字馬、拉筋、左扭右扭，勁晒波罅，佳麗們見狀冇癮自動彈開，練舞時麥明詩仍是最「演嘢」，被問是否鋒芒太露？她說：「我覺得大家冇咁嘅感受，關係OK，溝通冇問題。（舞技太好？）參選想攞演藝經驗，可能我跳舞好啲，但選美唔係選跳舞叻。（收斂吓？）我性格係要做到最好，唔覺光芒四射，係啲傳媒褒獎，繼續做番自己。」話雖如此，聲稱與佳麗溝通沒問題的她，在排舞室只與龐卓欣吹水，而當人人去藥房掃貨，她卻離群玩另類，留在車上休息。
佳麗趁空檔到藥房掃貨，掃了不少朱古力的Ada，充闊佬請佳麗品嘗：「我鍾意食朱古力，帶咗好多嚟，有請其他女仔食，但冇人食，我自己食，好有罪惡感！」被孤立的她更替宿敵麥明詩講好話：「唔覺佢鋒芒太露，佢跳舞啲高難度動作唔係個個得。（分享點減壓？）有傾，佢話壓力大瞓唔着。雖然我哋被拎嚟比較，但唔影響感情，大家都冇介懷過被指不和。（想挑戰佢跳舞？）唔好講挑戰，希望更上層樓。」
玩貓頭鷹喊驚
以運動Bra Top露小蠻腰的(5)林凱恩獲導師讚賞舞技，她說：「我唔識跳舞，喺酒店晚晚練，依家增加咗自信，覺得有少少跳舞天分，麥明詩跳得最好，佢有舞蹈底，好優雅。」(7)吳佩欣及(10)陳靜儀則獲導師點醒注意笑容。(6)吳慧堯昨午與麥明詩及龐卓欣到養有貓頭鷹Cafe拍攝，吳慧堯嚇到尖叫：「我由細到大都怕雀，見到都喊，今次好大膽，企到咁近，行出咗一大步！」