鍾舒祺解放撩Tony Jaa過招
身為鍾舒漫妹妹的鍾舒祺（Sukie）身形嬌滴滴，但原來實屬「有料之人」！性格直率的她自爆曾被老師指住大叫「黑柴」，令她一度討厭自己皮膚黝黑，直至後來才接受自己是一顆特別的「黑珍珠」！Sukie坦言有意進軍大銀幕，想做打女的她目標更是要成為亞洲版的安祖蓮娜祖莉，與Tony Jaa做對手拍打戲。
歌手鍾舒祺可謂是「港版Lady GaGa」，但原來平日衣着型格大膽的她，內裏思想保守，她坦言今次罕有以三點式上陣已是底線，更謂不會為工作全裸或半祼：「除非你天生麗質，如果唔係都唔會出嚟獻世。」她更大爆曾討厭自己天生皮膚黝黑：「小學時有個好大嘅陰影，老師喺全班面前指住叫我『黑柴』！從嗰時開始有段時間好討厭自己，會羨慕女仔白淨。不過後尾接受咗，仲覺得黑幾好睇(口忝)！（做黑珍珠仲好？）呢個係幾好嘅稱呼嚟，我接受上帝造我係咁，接受阿媽生我係咁，我多謝呢件事令我變得特別！」
做運動弗爆
曾客串電影的Sukie有意向影壇大展拳腳，目標是做打女：「我覺得我有呢個潛質，我鍾意動作片，想做亞洲版嘅Angelina Jolie（安祖蓮娜祖莉）！（想同邊個合作？）我幾鍾意Tony Jaa，好敏捷同好man！」做開gym的她並沒任何武功底子，但仍想拍打戲：「因為好玩，我知辛苦嘅，但嗰種辛苦先係精髓所在！」Sukie身材弗到漏油，她坦言全靠做運動保持完美身形。
逼家姐生B
本月16日踏入30歲的Sukie坦言人愈大愈愛簡單過生日，笑言生日願望是沒有皺紋，永遠保持青春美麗，問可會想快些結婚生仔？她坦言未有計劃，又擺家姐鍾舒漫上枱：「如果佢唔生嘅話我係唔會生(口架)，係都佢生先啦！」她又無厘頭笑言：「如果家姐結咗婚生完BB我咪唔使生囉，佢生完我幫佢養，我就唔使痛。（始終唔係自己BB？）我會令佢啲仔女覺得我係親生媽咪，唔畀佢哋叫我阿姨，一定要叫細媽咪！（父母催婚？）冇呀，由得我哋順其自然。」
Profile
姓名：鍾舒祺（Sukie）
生日：1985年7月16日
三圍：32B-23-34
身高：1米59
體重：96磅
學歷：Musicians Institute
文：音樂組
攝：吳文聰
髮型：Green＠fifthsalon