麥明詩龐卓欣逐鹿衫國
12位候選港姐昨日出發日本取景前拜神求順利，其中兩大熱門（1）麥明詩和（4）龐卓欣自添新裝做足準備，前者就購買2、3百蚊平價裙兼翻着面試戰衣，後者則豪花萬五富貴置裝，宿敵二人實行賽前提早預演激鬥，濕平分高下！
《2015香港小姐競選》12位佳麗昨日在將軍澳電視城為出發到日本拍外景作拜神儀式。談到出發前準備，「10優狀元」麥明詩（Lousie）就直言自己「未瞓醒」，因為要做好準備：「跳舞、化妝同儀態，由頭執到落尾。」更為此行帶備了好多衫。問會否特意準備戰衣，她笑謂：「帶番自己第一次面試嗰條裙，最代表到我。其實都買咗好多衫，都唔係用咗好多錢，因為日日要返電視城，唔想失禮自己同大會。（即係用幾多？）我都係上網買衫，2、3百蚊一條裙咁。」雖然家人有資助她添置新衫，但她就表示自己都有用補習賺的錢買。
男友陪揀戰衣
而「寸嘴Ada」龐卓欣亦坦言為此行特意去濕平，問有否添置性感戰衣？她謂：「港姐始終都係健康嘅性感，自己就準備咗比較Playful、活潑嘅衫去。（用咗幾錢？）我諗用咗15,000蚊左右，有啲自己畀，有啲屋企人畀。（選港姐都要用好多錢！）係呀，自己都估唔到。」又指選購新衫時，男友都有不少建議，幫她剔除不合適的衣着。兩大熱門到達機場入閘登機期間，亦被不少途人和機場工作人員認出，引起人們議論紛紛。
陳靜儀勤練舞
至於「翻版朱晨麗」10陳靜儀（Kristi）就在訪問時指自己準備實戰勤練舞步：「有進步咗，跳過少少咁，老師都好好。（邊個佳麗跳得最叻？）個個都好好，大家都學咗好幾堂。」
文：影視組