黎諾懿情未了 等朱慧敏回頭
藝人朱慧敏（Queenie）因男友彭懷安夜會索女令婚事叫停，關係仍未明朗化，不過她參與的處境劇前晚播結局篇，被指內容反映Queenie與男友真實的感情世界，無似有抽水之嫌！拍檔黎諾懿昨日指劇本早已定好，若有類似只是巧合，更指Queenie有望再現身該劇，不過未敢慰問她。
黃翠如、張繼聰（Louis）、黎諾懿、龔嘉欣及吳業坤等昨日出席新一輯處境劇《愛‧回家》宣傳，眾人與台下觀眾以不同組合形式合照，場面熱鬧。對於前晚播出結局篇，Queenie向「馬壯」諾懿感情剖白時似反映她與彭懷安的真實感情世界，仍未「開花結果」，無更被指抽水。
唔認為無綫抽水
諾懿撐無綫到底，否認公司抽水：「本身個劇情係咁去，拍完先發生件事，冇話邊個抽邊個水，咁啱啫。（但Queenie一句對白都冇！）原裝係咁，拍之前一兩個月收劇本，依家當係第一季完，其實啲演員第二季都喺度，所以Queenie都會有機會，大家唔需要太介懷個結局。（有冇聯絡佢？）冇，唔夠膽多問半句，成年人識得處理，有需要佢會打電話畀我哋。」
翠如繼聰嗌大交
翠如則透露日前與Louis拍攝一場激烈嗌交戲，不過現實生活與男友蕭正楠從未嗌交，自稱非野蠻女友的她還大讚男友又「腍」又乖，還笑言平時是恰他：「冇計啦！依家幾好，好似返到考會考咁，一齊溫書讀劇本。佢啱啱拍完劇返嚟，曬到好黑。」
Louis則透露未婚時性格暴躁，但與太太謝安琪相處久了，終體會到錯的一定是他：「點都係我番佢，我發現發脾氣力度同嘅時間成正比，佢成日同我講生仔好辛苦，又話佢爸爸有幾好幾溫柔，我識聽嘅！」
文：影視組