陳家樂內地被夾險3炒
陳家樂自爆人生首次接受手術，就是因踩車斷手所致。而年前在台中又因單車意外斷鎖骨，直到近日往內地宣傳新片時，他竟差點「重蹈覆轍」，幸最終避過「3炒」厄運。
英皇電影《破風》演員陳家樂昨與前港隊游泳代表朱鑑然、前新聞主播柳俊江等現身香港單車館，宣布成立「破風單車隊」，稍後將到訪各區推廣單車運動。談到《破》片下月上映，家樂直言相當期待：「可以睇番1年前拍攝時付出嘅汗水，不過票房就留番畀導演林超賢擔心啦。今次我奸到出汁，即使開拍續集，我都希望繼續奸落去，唔想再扮乖乖仔。」
猶記得去年家樂在台中拍攝時「炒車」受傷，昨日受訪時他卻再爆近日驚險遭遇：「同導演返內地出席慈善車賽，在場粉絲過份熱情，有啲單車『夾』住我嚟行，情況同台中嗰次受傷差唔多。我有陰影即刻煞停，跟住見到幾架車喺我面前炒埋一齊。」家樂又謂中一時已試過炒單車入院做手術，獻出人生的「第1次」。
朱鑑然游入藝壇
至於朱鑑然「處男下海」接拍《破》片，練車時亦意外頻生，幸而吉人天相。據悉他因此與男主角彭于晏（Eddie）熟絡起來，現年26歲的他計劃效法「大師兄」方力申殺入娛圈，並簽約Eddie經理人公司。而柳俊江被問到亞視「招兵買馬」一事，即幽默回應：「佢哋全球化，我係地頭蟲啫。佢哋要求講嘅普通話我未必講到，況且『重金』係咪出到（糧）先？唔好嘞！」
文：影視組