張智霖向荷里活電影追版權

【蔡振龍澳門直擊】張智霖(Chilam)在澳門個唱過了個笑中有淚的晚上,除笑稱兩大荷里活巨作抄襲其舊歌須追討版權外,更化身情聖「張至冧」發表愛的宣言,隔空冧爆老婆袁詠儀(靚靚),最後更在舞台兩度流下男兒淚,以淚水答謝歌迷!

張智霖前晚在澳門威尼斯人舉行演唱會,染了一頭藍髮的他開場不久發現背部耳機線鬆脫,即向工作人員求救幫拖,更大講有味笑話:「我要搵番條嘢出嚟先,件衫好緊,使唔使我除咗件衫先?」全場即陷入瘋狂狀態。

Chilam又繼續以「Cool魔」機師造型示人,更與性感舞蹈員玩「一王三后」任摸唔嬲,最後剝衫晒肌益粉絲。當唱到舊歌《逗我開心吧》時,他更笑言歌詞與荷里活兩部電影情節相似,有抄橋之嫌:「第一套係《Inception》,另一套係《星際啟示錄》,唱唱吓我發現佢哋抄我橋,我會攞番個版權。」

情聖上身冧靚靚

雖然今次靚靚未有捧場,但Chilam不忘隔空冧老婆:「我記得有句對白『一生一定會遇到個唔正常嘅另一半』,我就唔認同。我遇到個正常嘅,仲同佢一齊咗十幾廿年,可能我先係嗰個唔正常嘅另一半。」其後他繼續「情聖」上身剖白感情觀,更將靚靚迷戀韓星李敏鎬一事擺上枱:「得唔到嘅愛情永遠係最囉囉攣,就好似袁詠儀見到李敏鎬咁,嗰種感覺可以用以下呢首歌形容——《死去活來》。」在個唱尾聲時,Chilam兩度淚灑舞台,更一度未能平復心情,要求重唱《少一天都太短》,並感觸謂:「不要太分心,做藝人表演應該要專心,但我被你哋感動到。」

欣宜教趷籮搶鏡

當晚他請來「重量級嘉賓」鄭欣宜獻唱,穿上緊身衣的她使出招牌「擘腿」動作,又與粉絲玩遊戲,教他們趷籮及一字馬。Chilam完騷受訪時,表示囝囝張慕童在前一晚有欣賞綵排,但老婆則在北京趕戲。問到為何在台上哭崩人前?他說:「我聽人講,喺有賭場嘅地方開騷,大家反應會好平淡,唱到三分二就會走,但今日見到好多人睇到尾,咁好反應,好易觸動到歌手,冇枉費我個幾月嘅排練。」