蔡加讚派奶織巾多多億善
「玩具大王」蔡志明孻仔蔡加讚昨日出席慈善活動，他透露主力幫助老人家及低收入家庭，善舉包括贈福袋、派奶、織頸巾等，他更被工作人員爆料指捐了逾億元在慈善工作上，而蔡加讚亦未有否認，只表示希望可以回饋社會。
「玩具大王」蔡志明孻仔蔡加讚（Karson）昨日出席有份創辦的慈善團體義工服務日，邀請近五百名老人家到酒樓午飯，更親力親為在現場大派福袋。
Karson表示團體成立剛踏入一周年，主力幫助老人家及低收入家庭，他說：「尋日去派牛奶，因為之前搵過調查公司做研究，發現原來好多低收入家庭小朋友，經濟環境唔許可下，好少機會可以飲牛奶，所以會連續派兩個月，每日兩盒。（每次都會參與？）有時間都會盡量去做，之前就去探老人院同精神有問題嘅兒童。」他又指參與慈善工作是香港人的責任，希望可以回饋社會，大讚上一輩對於香港本土發展功不可沒。
唔識唱照獲掌聲
問到共捐了多少錢在慈善之上？身旁的工作人員聽後立即爆料：「過億啦！」而Karson亦未有否認，指太太汪圓圓也同樣熱心於慈善活動：「好似前年織頸巾畀老人家，我自己唔熟手，反而佢就比較熟手，希望自己小朋友大個都有心參與，當然要佢大個啲先啦！（邊刻最感動？）好多，有次去一間老人院，我去唱歌但唔識唱，但佢哋依然拍手掌同表現熱情。（當時唱咩歌？）粵曲！」
文：名人組