霸氣莫文蔚強搶定情金腰帶
歌手莫文蔚（Karen）昨日為亡父莫天賜的遺作舉辦發布會，更表示成功奪取了當年父母的定情之物「金腰帶」，連莫母亦忍不住取笑女兒愛搶，夠晒霸道。
莫文蔚（Karen）昨日與母親莫何敏儀及哥哥莫理斯一早現身發布會，莫天賜生前藝人好友薛家燕、何文匯及徐家傑等亦有出席。Karen在台上發言時，自爆今天所佩戴的「金腰帶」，是父母當年的定情之物，現獲母親割愛轉贈：「爹哋讀書時期係田徑健將，佢將比賽時獲得嘅金牌整成腰帶，再送畀媽咪，最後贏得媽咪芳心！」
田徑獎牌代代傳
問到為何會將定情之物轉贈愛女Karen？莫母笑言向來非常疼錫女兒：「我咩都畀晒佢，我啲嘢佢搶o架！但我有加句，如果第時有阿嫂就要分啲畀佢，但佢阿哥話唔使擔心，因為有排都未有阿嫂住，囡係霸道啲。（條腰帶掛住幾多金牌？）依家有11塊，仲有好多喺屋企，會代代相傳落去！」她透露推出新書是為了一圓亡夫遺願，因此書是將其手稿綜合而成，故家人們對銷量並不介意。
出書圓父親遺願
對於亡父遺作正式面世，Karen坦言感觸良多：「唔止睇到本書，自己無時無刻都會諗起爹哋，會將自己對爹哋嘅愛放喺作品上。（作首歌紀念？）唔會，因為冇可能用一首歌去懷念父親，會用一輩子去懷念！（用出書形式？）唔會刻意，感情係自然釋放。」而薛家燕則透露與莫家甚有淵源，與莫父莫母相識多年，故就算忙於工作，仍親身到來支持。
文：名人組