阿嬌錯失良機 賺少一層樓

阿Sa（右）與阿嬌姊妹同心，對投資畫作大表興趣。

Twins昨晚出席慈善晚宴，同場還有霍震霆長子霍啟剛與太太郭晶晶、應屆香港小姐邵珮詩、王卓淇、何艷娟，以及太子珠寶鐘錶主席鄧鉅明夫婦、女星關之琳等。Twins表示她們想在場內買畫，蔡卓妍（阿Sa）說：「我budget唔多，唔好咁多人同我爭。」鍾欣潼（阿嬌）則說：「最近好鍾意畫，可以擺喺屋企又可以投資。我７、８年前喺一個展覽睇中咗幅畫，如果當時買咗，依家賣咗可以買層樓，不過我冇後悔，唔係你嘅就唔係你嘅。」阿Sa說：「我想買外國啲畫，又靚又有升值潛力嘅。（你哋有冇投資眼光？）唔知，我同佢都有啲運仔，呢啲講彩數。」兩人又異口同聲表示不會買人像畫，阿Sa說：「除咗觀音嗰啲。（好似畀人(目及)住？）係，同埋我聽人講唔係咁吉利。（有冇自己嘅人像畫？）我哋通常係曬番自己相出嚟。之前方力申都送過一位畫家畫我哋人像嘅油畫畀我哋。」

晶剛囝囝兩歲唔大搞

而身為慈善大使的郭晶晶表示可以幫助到人自己都好開心，霍啟剛亦表示待囝囝大一點會一家人一起參與慈善活動，問到囝囝８月兩歲生日會否搞party？啟剛笑言：「唔知，我未問過老闆（他指身旁的晶晶），最緊要係一家人一齊，唔會大排筵席。（計劃生多個未？）都係四個字，順其自然。」

晶晶翹住啟剛，兩口子十分恩愛。

邵珮詩（中）否認自己有背景。

同場邵珮詩被問到可有留意有傳參選港姐需要有後台才會勝出，她說：「我覺得冇呢啲咁嘅事，全部選美都有評判，係專業嘅決定。（你面試時識唔識啲高層？）唔識，係選咗出嚟之後先見面認識。（你都畀人話有背景？）其實我都冇同公司講。（唔講公司都知？）唔知呀，填form時淨係填提名人，簽約時先填父母名，不過佢哋成日喺外國。」鄧鉅明就表示他時刻都做善事，更笑言遇到激氣的事會選擇唱歌跳舞，他更非常留意近期的演唱會，包括顧嘉煇、李克勤與容祖兒等。

文：名人組