陳柏宇蔡穎恩笑住嗌交

陳柏宇（Jason）日前與蔡穎恩（Evelyn）為新歌《別來無恙》拍攝MV，穿上婚紗的Evelyn跟Jason在鏡頭前肉緊攬攬，鏡頭後就不停講笑，Jason更不時講歪廣東話搞gag，氹得Evelyn哈哈大笑。

忍笑食NG

Jason承認期待跟Evelyn合作拍MV超過年半，故今次合作分外開心，不過，兩人沒有親熱鏡頭，只有吵架場面，Jason說：「好難拍，因為冇對白同唔收音，所以我哋講嘅嘢其實係極度無聊！有一幕我真係忍唔到笑，我話：『依家唔係我唔想買呀，但《天線得得B》真係冇出好耐啦嘛！』」Evelyn即笑言：「嗰個shot仲要係拍我喊喎，勁難忍，即刻食NG，搞到全場爆笑！」

Jason呢個鏡頭有王家衛掌鏡下的梁朝偉feel。	本來拍攬攬的溫馨喊戲，Jason搞gag令Evelyn爆笑。	放大圖片

若然要拍親熱鏡頭，Jason直認女友符曉薇會呷醋：「佢會撒吓嬌，然後話：『等我又去試番鋪先』。如果佢拍我真係介意o架，唔拍唔得咩？除非大家都係非常超級專業嘅演員，但我自問做唔到。」

用誠意求婚

Evelyn對圈外男友表明拍MV會被人鬧到喊，男友揚言「幫她出頭」，令Evelyn冧爆。已幾度穿婚紗的她會否特別恨嫁？Evelyn說：「想結婚同真係要結婚好大分別，個個女仔都會想嫁，到真係要結婚，好多嘢要考慮，例如對方係咪真係適合同自己終老？」

婚期定於兩年後的Jason已毋須考慮類似問題，並認定女友為適合人選：「雖然仲未求婚，但我唔想求其，第一佢想件事難忘，成日同我講：『你求得唔好我唔嫁畀你』，我唔信佢唔嫁畀我，不過我都會攞出所有誠意去做呢件事。」

文：音樂組