泳兒操馬甲線視聽雙響
英皇歌手泳兒最近以經典金曲《擋不住的風情》打頭陣宣傳最新Hi-Fi碟《風.情歌》，泳兒表示今次想挑戰更多不同風格，在新歌中大玩「椅子舞」吸睛，又落力踢走肥肉操出馬甲線，希望為大家帶來聽視雙重享受。
踏入出道第十年的泳兒一直以「靚聲」聞名，去年更成為英皇首位推出Hi-Fi碟的歌手，乘住去年的「發燒」餘溫，泳兒今年再推出第二隻Hi-Fi碟《風.情歌》，挑戰抒情以外的另一種風格，泳兒說：「對上一隻Hi-Fi碟比較抒情，同埋sell聲線，今次就會多玩唔同風格，編曲會比較唔同。」
避免繁複舞姿
講到泳兒在第一主打歌《擋不住的風情》的MV中與舞蹈員大跳性感椅子舞，她直言過去亦曾在快歌中跳舞，但過分繁複的舞蹈反而令歌曲失去了焦點：「成首歌啲手手腳腳都好忙，但最後發現大家係冇一樣嘢記得，今次用咗櫈嚟跳，主要係想用隻舞表達到首歌嘅感覺。」她又透露另一首主打《無心傷害》亦是一首舞曲，直言在新碟中希望給大家帶來更多的視覺突破：「其實咁耐以嚟大家喺聽覺上同聲線上對我都有一定認識，所以今次想喺視覺上有多啲突破。」
拒挑戰鋼管舞
問到向來善於唱抒情歌的泳兒「轉型」做跳唱歌手可會覺得吃力？她笑言：「係好吃力o架，特別今次又趴地又碌地，依家都要好好操一操，有Keep住做運動去練氣。」她又自爆希望練成馬甲線：「上腹已經有少少，目標會想練埋下腹，因為椅子舞會坐低，一坐就好易有舊肉出咗嚟，咁就唔夠靚。」
問到下次可會再挑戰近年Hit爆的鋼管舞？泳兒就即時Say no！她直言鋼管舞的衣着多數較少布，加上自己不是力量型身材，難以駕馭，反而對重視柔軟度的空中瑜伽有興趣。
文：音樂組
攝：黎志輝
Hair：Ziv.Y（www.pi4.com.hk）
Make up：Cyrus Lee
Wardrobe：10thshop.com（十舍）