陳靜秘撻台灣男恨做媽咪
藝人陳靜（DaDa）昨日出席活動時，除揚言恨做媽媽外，還大爆現正發展新戀情，對方是台灣人，希望自己的戀情可成為公開的秘密，更甜蜜地發表愛的宣言：「佢喺我心目中好好！」
藝人陳靜（DaDa）、歌手官恩娜（Ella）和名模Cara G.昨日齊齊出席彩妝品牌活動，身穿白色低胸長裙的DaDa大騷事業線，十分吸睛！現場有Ella和Cara兩位準媽媽，問DaDa會否有衝動當媽媽？她直言恨做媽媽：「我好想生呀，不過未有合適對象，我覺得啲人話懷孕嘅女人係最靚，我好認同，頭先見到佢哋好charm（吸引）。」她表示家姐有兩名女兒，還笑言常惹人誤會她一歲半的姨甥女是她所生：「因為佢個細囡好似我o架，所以好多人都曾經懷疑過係咪我生，咁我又真係偏錫佢，成日帶佢去游水。」
最緊要係錫自己
談到有否心儀對象時，她大方表示現有一個想發展的對象：「我都想開開心心咁公開，咁樣壓力相對都會細啲，但就唔想刻意講。（發展緊？）係呀！（唔係之前被影到嗰個？）呢個冇畀人影過，之前嗰啲係朋友，佢係台灣人。（點見面？）大家飛嚟飛去，所以有時佢飛過嚟、或者我飛過去幾日搵佢，（係咪做生意嘅高富帥？）佢喺我心目中好好，我揀男朋友最緊要係錫自己，同埋個人善良。」
官恩娜肚皮特大
另外腳踏4吋高跟鞋的Ella笑言懷B仔5個多月，肚皮卻出奇大：「其實5個幾月嚟講，個肚係大過其他人，之前去驗，醫生話BB係100個細路中排第13大，唔知係咪外國血統關係，預計佢出世時有8磅重。」她續透露剛與老公從泰國baby moon回來：「最後一次二人世界，我去到忙住幫自己set機同校時間掣影大肚相，但因為着三點式影，所以搞到被蚊咬咗好多啖。」
問到上圍有否升Cup？她說：「有呀，唔敢想像，之前啲內衣褲全部唔啱着，肥咗10幾磅。」而Cara則表示十分期待跟小女兒見面，她的預產期是7月30日。
文：名人組