1打40未驚過 子丹拆招難敵愛妻
「宇宙最強」甄子丹早前拍戲一對四十受傷，他出席活動時笑言傷痕是男人的戰績，面對四十人可以見招拆招，但對着太太一個就沒有法子，輕鬆帶過傷勢又可冧妻，厲害！
「宇宙巨星」甄子丹和太太汪詩詩昨晚一同出席慈善活動，同場有露背示人的Jocelyn及丈夫Anthony。擔任慈善機構大使的子丹，表示有機會也會帶子女做義工，試過一起到深水埗派米，令他們珍惜自己的幸福。早前子丹拍戲受傷，現場所見其鼻子及左眼仍有瘀傷，問到傷勢如何？他指着鼻子說：「個鼻嗰度起碼唔會破相，（有疤喎？）咪當青春豆囉，仲後生，男人多啲呢啲戰績冇所謂，我成身都有，內傷。」
斧頭柄擊鼻
子丹透露當時一對四十個武師，混亂中有一把斧頭柄飛彈過來，擊到其左眼及左邊鼻子；記者笑指他一對四十人算輕傷？他續說：「我問邊個飛把斧頭過嚟？冇人敢認，可能甩咗手，個斧頭係假嘅，但個柄係真。（最嚴重一次拍戲受傷係點？）都係縫針，其實見血見骨仲好啲，內傷先慘，瞓覺就痛，有啲傷跟你一世。（公司有冇幫你買重保險？）應該有買，但我唔知幾多錢，我唔諗呢樣嘢，覺得好似唔老利，好彩都冇claim過，唔係太嚴重。」
詩詩喊擔心
問到在旁的詩詩可有擔心而哭泣？她說：「我冇喊，但都好擔心，因為今次傷到眼！」愛妻號子丹聽罷太太喊擔心，即開玩笑說：「我同佢講，對付40個人唔難，可以見招拆招，反而老婆一個對付唔到。」詩詩即作狀沒好氣，夫婦二人打情罵俏！
文：名人組