關之琳難止謠傳搵法王幫手

大美人關之琳前晚聯同鍾鎮濤（阿B）及其囡囡鍾懿，以及關秀媚、胡渭康等出席法王生辰慈善晚宴，保養得宜的之之以深藍色上衣配黑色開衩長裙現身，薄紗上衣更隱約透出內裏白bra，十分吸睛！而拍照期間鍾懿又主動錫爸爸，氹得阿B十分開心。

每星期行幾次山

之之透露來此活動是因為法王生日和為尼泊爾賑災，但就謂不會上台表演：「上次偉仔（梁朝偉）同阿菲（王菲）有唱歌，佢哋唱得好好聽，呢真係要練多先得，自己平時少唱歌，用個心支持就得。」談到近日又有傳她患腦癌，她否認並斥報道沒有根據，恰巧日前她上載行山相到社交網，問到可是為了證明身體好？她說：「唔係，我行咗廿幾年山，每星期都會行三至四次。」

阿B與女兒鍾懿於晚宴上合唱《心經》，更大讚囡囡記歌詞很快。	久未露面的關秀媚風采依然。	鍾懿主動與爸爸咀嘴，氹得阿B非常開心。

之之今次透過公司發聲明以正視聽，她謂：「唔可以亂講，每年都傳好多，好煩。（會法律追究？）係，但用法律行動都依然有人繼續咁講，可能叫法王懲罰吓佢哋先！」

阿B父女合唱《心經》

至於同場的阿B則透露當晚跟鍾懿合唱《心經》，他大讚囡囡記歌詞很叻：「反而依家我記歌詞唔夠佢快，睇見佢就諗起我啱啱出道嗰陣記歌詞特別快。」當日正值父親節，他表示鍾懿送了一個罌給他作禮物，他笑言父親節當日苦悶，因為三個女兒都各有節目，只好捉了老婆一起食好嘢。阿B透露日前為八月將滿十一歲的鍾懿提早舉行泳池派對慶生：「因為到時佢啲同學個個會飛晒，所以早啲慶祝。（鍾懿係咪收到好多禮物？）最大份禮物咪老竇老母畀佢囉！（畀咗咩？）同佢搞個party囉！」

文：音樂組