龐景峰變臉回歸 揀戰衣攻韓流

郭秀雲與前夫錢小豪的兒子龐景峰(Andrew)早前獲韓國公司睇中成為歌手,昨日Andrew在20多名韓籍工作人員陪同下,飛回香港預備與人氣女團After School前隊長嘉熙拍新MV。一行人先到香港著名設計師何國鉦工作室揀戰衣,郭秀雲則全程在旁打點,而Andrew表示自己的目標是像韓星Rain一樣。

為迎合K-POP市場,Andrew的形象及外觀與過往明顯有差別,但他揚言對整容非常反感:「公司冇叫我整容,只係叫我減肥。(有冇諗過?)冇。(如果公司要求呢?)冇諗過,唔想!好多朋友唔知我簽咗公司,話睇完造型照覺得我整容,我有解釋過,因為每朝七點要起身訓練,一定會瘦!」他又透露很欣賞嘉熙,指錄音時經常獲對方提點,私下兩人也十分要好。

郭秀雲尊重決定

提到父母因其出唱片一事引發不和,Andrew表示會做和事老。郭秀雲則坦言不想做星媽,但會尊重兒子決定,讓他做自己喜歡的事。問郭秀雲有否懷疑錢小豪曾發放Andrew的宣傳照,她說有可能,因沒其他人會這樣做,雖然如此,但不覺得他是衰人。

文:名人組