王宗堯50萬買車 張建聲吸金救父
新一代男神王宗堯貴為影壇新貴，再加上廣告不斷，短短半年已勁賺近200萬，擁有財力的他日前更孖女友人到車行睇車，花了10分鐘便豪擲50萬做車主，而同公司的張建聲曾為電影增肥幾十磅，近日亦被睇中以6位數字接拍廣告，已減磅成功的他未有鬆懈，積極狂操肌練大隻。
新進男神王宗堯（Greg）憑深情暖男形象成功上位，現年36歲的他入行多年，近年加盟蕭定一旗下中國3D數碼娛樂後，終於成功冒起，電視、電影、廣告工作源源不絕，月前更以二千萬續約蕭定一公司，並獲支持成立製作公司自導自演新戲，令去年仍住銅鑼灣二百呎劏房的他，不但搬到獨立單位，日前更被發現到車行買車做車主。
趕住開工搵銀
Greg日前被發現趁工作空檔，與女友人到灣仔車行睇車，戴上黑超的他，細心聆聽車行職員介紹，期間Greg多次用手比畫，似乎在講述自己對車型方面的要求，最終睇中了推出不夠一年的新款凌志房車NX300h，車價逾50萬。Greg扑錘後在車行逗留約十分鐘，才在車行職員送行下與女友人離開，並趕下場繼續開工搵銀。
而同公司的張建聲（Justin）亦不讓Greg專美，為電影《一路向西》減磅至143磅做瘦仔，再谷肥至逾二百磅演《壹獄壹世界》惡霸，近日為拍攝新廣告，減磅至153磅並操肌有成，進帳六位數。Justin經歷變瘦變肥再變瘦，他形容心情似坐過山車：「谷肥嗰段時間零工作，公司雖然提供生活費，但覺得自己好頹，有種墮落感，萬一套戲唔開我就玩完，身心都有壓力，想過放棄，但揀咗冇得返轉頭，我想做一個成功嘅人，最後靠意志捱過。」
視師兄為榜樣
雖然工作不斷令荷包腫脹，但孝順的他未有想過當大花筒，據知Justin父親患有喉癌，故他準備把所賺的錢全數給家人處理：「因為父親健康狀況唔好，醫療需要錢。（羨慕王宗堯有名有利？）佢嘅成績係應得，係我師兄，亦係我學習榜樣。」
文：影視組